- Civic Duty 2006

- Civic Duty 2006

- فيلم لاكبر 16 سنة او 18 حسن هيفهم الحوار السياسي ولا لا.

- الفيلم قديم نسبيا بس متشافش اساسا للاسف ....لان في الدول اللي نزل فيها وهي قليلة جدا الفيلم نزل DVD علي طول ...اتعرض سينما في البرازيل بس و في كندا و اميريكا limited يعني محدود وباقي الدول نزل مهرجانات بس ...يعني متشافش ..... طب ليه ياجدعان ؟؟؟ هو فيلم وحش ولا هو فيلم مهرجانات ولا ايه العبارة ؟؟ .

- الفيلم بيحكي مدي تأثير الاعلام الامريكي علي الشعب الامريكي نفسه من ناحية ان العرب ارهابين و قتلة .....الخ من الاسطوانة دي ... بيظهر ده في شكل مواطن امريكي مضطرب نفسيا شوية يعني لما بيسكن جمبه شاب عربي بيدرس في الجامعة (مين بقي يابرنس ....خالد ابو النجا ...وده السبب التاني لمشاهدتي الفيلم) .... طبعا الفيلم احداثه مش قصصية قوي قد ماهي تصرفات مبنية علي بعضها ..... طبعا الطبيعي ان المواطن الامريكي بيجعل نفسه حامي للوطن علي حساب الشاب ده بس بشكل مش طبيعي ....و بيوصلك هو ليه وصل لكده ..... طبعا مع استمرار الاحداث

- Jeff Renfroe : الاخراج ... شغله اغلبه تلفزيوني ... بس الفيلم ده مكنش كده الصراحة ...كان مديك احساس النوعية دي من الافلام الامريكاني بتاعت Eagle Eye و Enemy of the State يعني ترقب و غموض ...الاخراج كويس و كمان اختيراه للممثلين عموما و توجيهم و كمان في كادرات بين بطلي العمل او المواطن الامريكي و العربي اديت للحوار شكل اجمل واعمق

- Andrew Joiner : المؤلف و المنتج .... اول عمل ليه عموما تأليفا و انتاجا و اعتقد الفكرة لوهو ما انتجهاش كانت هتفضل في الدرج ... الافكرة جرئية و اتكتب حلو قوي و الحوار في الفيلم محصلش الصراحة .... نقطة تحسب له من هنا لبكرة ... بس لحد الان معملش اي فيلم تاني مش فاهم ليه ؟؟

- Richard Schiff : عميل ال FBI اللي علي عكس الافلام طالع عادل جدا في اسلوبه و تعامله ولما بيوصله اتصال من المواطن الامريكي بشكه في المواطن العربي بيعمل بحثه من غير حتي ما يستجوب المواطن العربي .... طبعا ممكن تحسها اوفر شويتين بس هي ممنطقة جدا في الفيلم و تقتنع بيها ..... هو عمل الدور مظبوط الصراحة

- Kari Matchett : زوجة المواطن الامريكي .... دي الجزء الاخر العقلاني في الفيلم ...او الجزء العملي جدا اللي هو حتي لو اللي ساكن جمبها ارهابي مدام مش بيقرب لها هي يعمل اللي يعجبه ...الصراحة برضه اختيار موفق خصوصا المشاهد الاخيرة ليها .

- Peter Krause : المثل الاول و احد المشاركين في الانتاج .... الصراحة دور رائع بجد و ردود افعال و رسم لانفعالات الشخصية مش معقول .... رغم انه ممثل تلفزيوني بس ده ميمنعش من تمكنه من ادوات الشخصية ....

- خالد ابو النجا : و يستني للاخر لانه بجد تنسي اي فيل م عملوا قبل الفيلم ده ..... شكل تاني و اسلوب اداء تاني .... ممثل بجد و من الاخر و تقيل قوي .... بصراحة سرق الكاميرا في الفيلم و ده مش مجرد رأي شخصي او مصريتي بتنقح عليا ... في مشاهد جمعت بينه و بين بيتر كراوس ... بصراحة مبارة بين الاتنين بي تغلب فيها خالد بسلاسة في الاداء و يمكن عشان تعاطف المشاهد مع الشخصية دي غصب عنك حتي لو انت امريكي ....طبعا اختيار من المخرج و المنتج في محله و خالني نفسي اشوف خالد في اعمال هيولودية و يقدر علي ده .

- الفيلم واخد 6.4/10 بس من عدد اصوات قليل وانا بديله برضه 6/10 ...الفيلم حلو ولازم يتشاف بس السؤال ...هو الفيلم متشافش اساسا ليه ؟ عشان معظم اللي فيه مش هوليودين يعني بلا اسم ولا عشان الفيلم واخد الجانب العكسي من تأثير الاعلام الامريكي ؟؟؟ ....