from : the gr8test one

from : the gr8test one

الثلاثاء، 25 مايو، 2010

- Micmacs à tire-larigot 2009





- Micmacs à tire-larigot 2009


Rated R for some sexuality and brief violence


- الفيلم الجديد للمخرج Jean-Pierre Jeunet مخرج فيلم Amélie المشهور او لمحبي الترجمة الحرفية (المصير الرائع لايميلي بولان) و مجموعة تانية من الافلام اللي بعتبرها تتدرس لاي حد يحب يفهم يعني ايه تعمل فيلم ويعني ايه تاخد لقب مخرج .... مش مجرد اكشن و ستوب و ااقلب زي نظام التوك شو .


- القصة : (بازيل) شاب عنده سوء حظ مع الاسلحة ... من اول مشهد بموت والده في انفجار لغم لحد اصابته هو شخصيا برصاصه في دماغه و بيعيش بس بيفشلوا يطلعوا الرصاصة و بيعيش و هي في دماغه و ده بيخليه ساعات يفقد تركيزه باللي حواليه ..... و بيتشرد و بيقابل خليط عجيب من البشر وبيروح يسكن معاهم فيما يشبه الكهف شوية و بيتعرف علي اغرب شخصيات و مواهب من مخترع لبنت بتحسب اي شئ في الدنيا لواحدة جسمها مرن لدرجة تخليك هتجنن J .... من الاخر اغرب سيرك تتخيله .


وبيعيش معاهم بس بيقابل صدفة مرة شركة الاسلحة اللي ساهمت في قتل والده و اصابته هو شخصيا و بيقرر ينتقم (كالعادة يعني) و (كالعادة برضه) المجموعة الغريبة دي هتساعده .


- التأليف : Jean-Pierre Jeunet و Guillaume Laurant : 3 فيلم علي التوالي مع بعض اولهم(ايملي) اللي اترشحوا عنه للاوسكار و تانيهم (خطوبة طويلة جدا) فيلم حربي بس بطعم فرنسي مفيش اجمل منه ..... والمرة دي كوميديا/جريمة .... بس الموضوع المرة دي قلب جو امريكاني و انجليزي موضوع مستهلك الا في التفاصيل اللي صاغوا بيها القصة زي موضوع انه اضرب برصاصه في دماغه بس مامتش و الشخصيات اللي قابلها في الكهف غير كده مفتكرش فيه اي تجديد او نفس الروح اللي كانت موجودة في الفيلمين اللي قبليه .... سير الاحداث في بعض الاجزاء كان شبة اسلوب المخرج الانجليزي الاشهر (Guy Ritchie) وده اسلوب تقريبا متسجل باسمه في كل افلامه اللي كاتبها و اخرجها .





- الاخراج : Jean-Pierre Jeunet .... بعتبره في المرتبة التانية في قايمة مخرجيني المفضلين وده لاسباب كتير تحتاج كذا موضوع مش مقال نقدي لفيلم ...

الفيلم مختلفش اخراجيا عن كل شغله ... لازم يجيب لقطات و اشكال و الوان تخليك مشدود طول الفيلم حتي لو الفيلم نفسه ممل .... من اول اللقطات السريعة (فوتو مونتاج) اللي بيتبعه في بعض افلامه زي (ايميلي) و حتي تنفيذ اللقطات دي (خصوصا مشهد اصابه بازيل بالرصاصة و طريقة الاصابة اصلا) خلاني مش مصدق هو اصلا بيفكر فيها ازاي ....

الوان الفيلم .... في اسلوب في الافلام (تقريبا صعب تلاقي فيلم مستخدمة في مصر الا في افلام تتعدعلي الصوابع زي فيلم زي النهاردة) فهو خلي اللون النحاسي سائد في اغلب الفيلم و كان بيكسره بالوان من نفس الدرجة زي النبيتي او لو الوان تانية (احمر/اخضر) و دي حالات قليلة كانت بيختار الغامق او الداكن من اللون ... و ده مش استظهار ده عشان يدخلك اكتر في جو الفيلم اي كان نوعه

بس طبعا الكلام ده مبيبقاش عند في افلام لسه متعرفش تعمل فيلم واحد من غير راكور !!!

حركة الكاميرا هادية جدا و انسيابية بس مش سايبة تفاصيله (هي عادته ولا هيشتريها يعني؟؟) لقطة واحدة بوظت الصورة شوية هي لقطة (بازيل) لما طار في الجو بانت قوي انها تركيب للاسف



- Raphaël Beau (بتاع المزيكا) عاجبتني دا و فضولي دفعني اشوف مين ده و شغله اللي فات ....اكتشفت ان ده اول عمل ليه و مفيش اي معلومة عنه اصلا !!! تفتكروا مخرج بالحجم ده بيشتغل ليه مع ناس جديدة :):) ....



- التمثيل :


- Dominique Pinon : تميمة الحظ للمخرج ... اشتغل معاه من سنة 1989 في فيلم قصير و كل افلامه الطويلة حتي لما عمل Alien 4 خده معاه .... ممثل وجود لذيذ ... مش عبقري بس كوميدي و انا بحبه .


- Nicolas Marié : (احد تجار السلاح) بس تعاطفت معاه جدا و مش عارف ليه افتكرت فيلم Lord Of War اللي اتكلم عن نفس الموضوع وعن ان التجارة دي علي قد ماهي مؤذية بس علي الاقل السلاح ليه زر امان .




- Julie Ferrier (اسمها صاحبة الجسم المطاط) J... ممثلة اندهاشي كله من حركة جسمها اللي صدمني اكتر اني اكتشفت انهاعندها 39 سنة !!!! و الدور عموما خفيف و هي اصلا ممثلة جديدة .


- Dany Boon (دازيل) : مخرج و كاتب و ممثل ..... بس الحقيقة انا متشديتش بتمثيله للدرجة عكس مثلا Mathieu Kassovitz اللي مثل دور (نينو) في فيلم (ايميلي) .... هو شكلا اقنعني بس اداءاَ عادي جدا و يمكن ده اول فيلم للمخرج ده البطل الرئيسي ميقنعنيش او متعاطفش معاه للدرجة .


- الفيلم واخد 7.3/10 وانا اديتله 6/10 ... بعد انتظر 5 سنين الفيلم ماشبعنيش للدرجة وللاسف الفيلم اللي جاي لـ Jeunet لسه 2013 (هو بيعمل فيلم كل 4 او 5 سنين) وهو من انتاج سبيلبيرج و بيتر جاكسون و هو من فيلمين بينتجهم عن (تان تان) ... الاول هيبقي 2011 و هو اخراج سبيلبيرج نفسه بس هما مش جزئين عموما .



- الفيلم للاسف منزلش ولا هينزل مصر لاننا منعرفش للاسف في السينما غير السينما الامريكية وياريتنا بنعرض كل افلامها .... لينك تحميل الفيلم للي يحب (مترجم و دي في دي) اهو ... رغم اني مبحبش كده بس دي الطريقة الوحيدة عشان تشوف الفيلم :

http://www.aflmak.com/vb/t31849.html

الثلاثاء، 11 مايو، 2010

- تلك الايام





- تلك الايام


+ 18 (تقريبا كده السن صح لان الفيلم معقد اصلا)


- رواية لفتحي غانم وبطولة الفيشاوي و محمود حميدة معتقدتش في اي شئ مشجع اكتر من كدهىعلي الاقل بالنسبة لي ...


- تريلر الفيلم (الاعلان) مشجع لاي حد بالتأكيد انه يدخل الفيلم .


- القصة : استاذ جامعي ذو وضع مرموق في البلد و مرشح للوزارة و صديق للسلطة بيستعين

بضابط سابق من الداخلية عشان بيكتب كتاب عن الجماعات الارهابية في مصر اللي الضابط ده قبل مايستقيل كان ليه مواجهات معاهم كتير ... و بنشوف علاقة بمراته الاصغر منه و حياتها اللي علي النقيض تماما و بتتعمد تعمل كل شئ ضد جوزها .


- الرواية : (فتحي غانم) اعتقد انا مش هقيم فتحي غانم بس الرواية افضل كتير جدا رغم ان الرواية اتحذف منها 100 صفحة كاملة و محدش يعرف اتحذفوا ليه او ايه محتواهم حتي .


- السيناريو و الحوار (علا عز الدين) : تاني فيلم في نفس السنة... مشفتش الفيلم الاول (ولد و بنت) بس الفيلم ده حسيت السيناريو بطئ جدا و الحوار كان غريب و اول الفيلم مكنش راكب مع الشخصيات (الا شخصية احمد الفيشاوي دي مظبوطة حواريا كويس قوي)


- الاخراج (احمد غانم) اول عمل و الحقيقة من التريلر توقعت حاجات تانية خالص غير اللي شفتها في الفيلم .... وخصوصا علي حد ماعرفت ان الفيلم بيتجهز من 7 سنين !!!!!


1) اختيار الممثلين : الحقيقة البطلين الرئيسين تمام غير كده في كمية ملاحظات يعني كلنا عارفين ان صفية العمري كبيرة بس مش لدرجة انها ام محمود حميدة اللي هو نفسه كبيرفي الفيلم !!!

و ليلي سامي (اميرة) دورها رئيسي و معقد الحقيقة محسيتش بده نهائي طول الاحداث وحتي ناس كتير علقوا نفس التعليق .... تمثيلها مقنعش اي حد خالص بانها بتعاني او اي شئ .



2) مشاهد طارق التلمساني (بروفسيور امريكي) و نهير امين (سفيرة امريكا) ليه اتعملت لغة عربية فصحي !!! هو لو اتكلموا انجليزي و الكلام اترجم هيبقي مشكلة !!!! و ليه فصحي بالطريقة دي !! (يعني كلمة هراء اللي قالها التلمساني بدل ماتدي مدلول سئ علي الشخصية الرئيسية خلت السينما كلها تضحك بس علي الكلمة و الاسلوب) !!!!


3) الفيلم بطئ بدرجة غريبة و دي مشكلة يتحملها السيناريو والاخراج !!! ... انا عموما نفسي طويل و بستني مع الفيلم هاشوف هيوديني فين ... بس من الملل كنت خلاص بموت وفكرت ااقوم كذا مرة .


4) ما اعتقدتش في مشاهد علقت معايا في الاخراج او التصوير غير مشهد حادثة القطر و مشهدالفيشاوي لما نزل صلي في الجنينة ... غير كده محسيتش ببصمة نهائي للاخراج .



- عبده داغر (بتاع المزيكا) : المزيكا مشيت حلو و رائعة طول الفيلم بس في مشهدين للمطاردات المزيكا مشيت برتم و الاحداث كانت ماشية برتم تاني خالص .



- التمثيل :

- سمية الالفي (ظهور مشهد واحد) بس من اجمد المشاهد رغم انهم كلمتين بس معرفش انبسطت جدا اول ماظهرتي .


- صفية العمري (قدرية) : التمثيل مفيهوش كلام بس اختيار الدور مبلعتوش طول الفيلم نهائي .


- ليلي سامي (اميرة / زوجة محمود حميدة) : الحقيقة مقتنعتش بالدور نهائي ولا في اي مشهد وده ممكن ميكونش عيب مباشر فيكي بس انا مبلعتوش و الدور نفسه تقيل و معقد يعني من نوعية انك يتسيبي بصمة قوية قوي يا متسبيش و اللي حصل التاني للاسف .


- محمود حميدة : كالعادة ممثل تقيل جدا و شخصية معقدة جدا في كل افعالها و معتقدتش كان حد ينفع يعمل الدور ده بدالك ؛ مشهدك قدام الفيشاوي تحفة و خصوصا مشهد الازهر بارك .



- احمد الفيشاوي (علي النجار) : ببنسط ان يوم ورا يوم رأي بيكون صح و انا من اول يوم معجب جدا بادائك و فيلم عن فيلم بتعلي جدا .... الدور عاجبني جدا و ردود افعالك الصامتة و اللي اعتمدت علي نظراتك او حركات وشك و انفعالاتك رهيبة بجد و تقريبا دي المشاهد الوحيدة اللي علقت معايا في الفيلم كله .... بجد من الناس القليلين في مصر في الفترة دي بيعرفوا يمثلوا ... والجزء الاكشن كان كويس و لو مثلت اكشن مش هاتضيق خالص (وربنا اعلم بقي بقصدي) :):)



- الفيلم ملحقش يتقيم في اي حتة لان الريفيو ده بيتكتب اول يوم عرض فتقيمي للاسف 5/10 .... والاخراج هو السبب للاسف و بعديه السيناريو و اداء الممثلين ..... لو استثنيت الفيشاوي و محمود حميدة و ظهور سمية الالفي مش هلاقي حاجة اديها درجة .