بحب السيما

أكس لارج

2011-11-18T18:26:00.000-08:00

النوايا الطيبة لا تصنع فيلما جيدا ... دايما بفتكر الجملة دي لما الاقي شئ كويس او فكرة كويسة وهي معمولة زفت ...
بس لما يبقي كل حاجة وحشة دي تسميها ايه ؟؟

القصة : شاب تخين قوي وصديق لناس كتير، بس مش عارف يحب ويتحب (عادي) ... واللذيذ انه من تخنه بيصلي علي كرسي مش سجادة (عادي ربنا معاه) ... ولما بيخرج يسهر بيرقص ويتنطط ويقع ويقوم برشاقة شاب وزنه 70 كيلو (المفروض عادي برضه).
المهم بيتعرف علي بنت من ايام مدرسته عايشة في دولة عربية وبتقرر ترجع مصر، وبيتعرفوا علي بعض ... الهم لما بتيجي بيكدب عليها ويفهمها انه ابن عمه ويبتدي يخليها تحبه (وهو تخين... شوف حكمة ربنا يامؤمن)
هي بتحبه وتميل له (ربنا يتمم بخير) بس يا للماسأة، بتحاول تخليه يخس بالإشتراك فى خطة مع خاله ... اللي قاله لو مخستش مشوفش وشك .. في حين إن خاله نفسه تخين، وهو اللي بيجيبله الاكل (وهنا تقع في مشكلتين ياخاله اهبل ياعبيط .. يا المشاهد المفروض يعديها)
وبعد ما خاله بيتوفي ... البنت بتصارحه انها عارفه انه زميلها، وبترفض ترتبط بيه لانه ببساطة تخين (تخين ...تخين ... صدي صوت) وبعد شوية اكتئاب بيقرر يخس ويرجع رفيع فتلة ... واكيد بيتجوز البطلة.

الاخراج (شريف عرفه): طبعا مش هارغي كتير، كفاية ان السيناريو لشخص تخين قوي ومطلعه بيرقص برشاقة باليرينا ... ولما يتخبط ويقع بيقوم اسرع من لاعيبة الملاكمة ... !!! المفروض اقتنع انه تخين ولا انه فيلم كارتون ؟؟

التاليف (ايمن بهجت قمر): الحقيقة مكنتش متوقع اكتر من كده، بس الحقيقة انا اتفاجئت بالعنصرية الفجة في الفيلم تجاة التخان ... مفيش شىء يا استاذي اسمه ياتعيش رفيع ياتموت لوحدك ؟ فى انهي منطق اصلا ده ؟
فيه ناس تخان متصالحين قوي مع ذاتهم، وعاجبهم تخنهم واتحبوا واتجوزوا من غير اي مشاكل.
جزئية انك تعمل فيلم وعظي كوميدي ... اسكتشات تنتهي بالدرس المستفاد، ان التخن يا ولاد وحش ولازم نخس عشان نتجوز ... ده ماسموش سينما ولا ينتمي ليها ... الدروس المستفادة والافلام الوعظية دي بنحكيها للاطفال مش للمتفرجين.
وبعدين اصلا دي افلام ديزني نفسها معملتهاش ... لأن الرسايل الموجهة في الافلام اخطر ما يكون ..

مينفعش تعملي فيلم تقولي التدخين ضار جدا بالصحة ويسبب الوفاة !!
دي اخره اعلان في الجرنال مش فيلم ساعتين وربع ؟؟
في رأيي الفيلم مش سئ بس هو عنصري جدا وعدواني تجاه التخان، وده مش رأيي انا لوحدي ... اغلب اللي اعرفهم تخان او محبين للاكل فعلا مش طايقين الفيلم وخارجين بيشتموا فيه .!!!

التمثيل :

الفيلم شبة شرفي للممثلين اللي فيه معظهمهم ظهر فى مشاهد قليلة قوي ... باستثناء احمد حلمي ودنيا سمير غانم.

ابراهيم نصر : اختيار موفق وكفي !!

دنيا : ظهور لذيذ بس اعتقد ان الدور سخيف ويقفلني منك شخصيا

احمد حلمي : ببساطة كنت بحب حلمي ... بحب اجتهاده وتنوع ادواره ... ولذلك احييه قوي انه عمل شخصية زي دي، وطول الفيلم بيظهر بشكل مش شكله ... لانها خطوة مش اي حد يعملها.
بس للاسف لما نيجي نشوف اخر افلام حلمي (بعيدا عن النجاح التجاري) هنلاقي الافلام بقيت مبتذلة ومواضعيها يا عايمة يا مستفزة ..
اعتقد من حق الناس عليك انك تنقي شوية افلامك وتتعب فيها اكتر من كده، وفي النهاية انت كسبان واحنا هنكسب سينما لذيذة من غير استفزاز وافكار عنصرية.

الفيلم معتقدتش اديه 2/10 حتي، لاني مضحكتش ولا مرة في الفيلم ولا انبسطت وانا بشوفه ..
وبتمني اني مكنتش اتفرجت عليه اصلا !!

سيما علي بابا

2011-11-08T18:19:00.000-08:00

سيما علي بابا

انتظار فيلم مكي في السنتين اللي فاتوا هو اللي ممكن يصبرك علي الافلام الكسر واللاسينما اللي بنشوفها طول السنة

فاحنا مبقناش نعمل افلام الا عدد محدود جدا تستطيع الاستمتاع بيها علي المستوي الفني او علي مستوي المتعة .

تريلر الفيلم : مقدرتش احدد اي من اعلانين الفيلم (الجزئين) افضل او انهي فيهم شدني اكتر لاني ببساطة حسيت بخيبة امل من الاعلان من غير اي سبب .

القصة : الفيلم اسمه متاخد من دار عرض سينمائية بتعرض فيليمن بتذكرة واحدة

والفيلم هنا جزئين كل جزء ساعة تقريبا وكل جزء حكاية ... مبيجمعهمش غير تتر البداية اللي الصراحة افضل ما في الفيلم !!!

الحكاية الاولي (حرب الكواكب) : هي محاكاة لحرب الكواكب ..بس هي منطقيا مسرحية الزعيم بالنص تقريبا ...زعيم الكوكب بيموت فيجيبوا حد شبه اللي هو حزلئوم .... يعني نفس الفكرة (اللي اتهرست في 100 فيلم قبل كده زي لاتراجع ولا استسلام) ....

الحقيقة ما اضحكتش تقريبا في الجزء ده اكتر من مرتين مثلا

الحكاية التانية(الديك في العشة) هنا بننتقل لفيلم كارتون وهو تحديدا (حياة حشرة) بس بدل مجتمع النمل هنا مجتمع من كلب وفرخة وارانب وجدي منتظرين ديك ينقذهم من الضباع اللي بتستغلهم ... وبس

قصدي الديك بيرجع وبينتصرو ويتجوز الفرخة اكيد في تتر النهاية

شريف نجيب : مؤلف – الحقيقة كنت منتظر اقوي من كده خصوصا بعد لا تراجع ولا استسلام وخصوصا اني عارف ان شريف يطلع منه اشد من كده فعلا بكتير

الجزء التاني من الفيلم كان فيه محاولات كوميدية اكتر من الاولاني فعلا بس في المجمل انا مضحكتش زي ما كنت متوقع

احمد الجندي : اللي ااقدر ااقول انه بيميز الفيلم ...صورته حلوة قوي والخدع البصرية مبهرة

الغلطات اللي كانت في تتر النهاية لانها هي اللي كانت كوميدية اكتر من العمل

يحسب كمان للجندي المزيكا (مصطفي الحلواني) والازياء (بسمة الغامري) الاتنين كانوا ابطال الفيلم لو هنعتبر فيه بطولة اصلا

التمثيل :

لطفي لبيب : الدور في الفيلم التاني افضل كتير اداءا وكوميديا

بدرية طلبة : رغم تميزها في مدرسة الاوفر الا ان الفيلم ده كان اداءها مظبوط ومفيش فيه اي افورة وده افضل

محمد شاهين وهشام اسماعيل ومحمد سلام : اداء طبيعي بس الحكاية التانية كان فيها اداء افضل من اغلب الممثلين

ايمي سمير غانم : تلقائية شديدة بس اعتقد محتاجة ادوار تانية عشان متتحصرش في الاداء الواحد ده

مكي : دور حزلئوم كان يبقي افضل لو فيلم ساعتين ...(رغم انه اصلا فكرة تكرار التجربة مش محببة ليا )

في المجمل ادائك دايما بيبقي مظبوط بس نرجع ونقول ان الفيلم كله اصلا مش قد المستوي فبالتالي اي اجتهاد شخصي هيروح في الرجلين مع باقي عناصر العمل

النهاية : الفيلم ميخودتش ازيد من 3/10 علي الصورة والمزيكا والملابس ...غير كده اعتقد فريق العمل مكي والجندي وشريف محتاجين يعيدوا تقييم التجربة دي ومنتظر منهم تجربة تكون افضل من دي كتير

مسلسل الجامعة 2

2011-10-04T04:18:00.000-07:00

نشرت البريفيو من كام يوم بس مظهرش في الريدر عموما ادي اللينك

مسلسل الجامعة

مسلسل الجامعة

2011-10-01T05:44:00.000-07:00

الجامعة

انتشرت الفترة الاخيرة نوعية جديدة من المسلسلات ااقرب للمسلسلات الاجنبية فهي مش سيت كوم ومش مسلسل بالشكل الدرامي اللي احنا نعرفه ... طريقة فالتصوير والكتابة وحتي عدد الحلقات والتقسيم لمواسم .

مسلسل الجامعة تجربة كان لازم الواحد يقف عندها شوية مش لانها حلوة او سيئة بس لانها فيها تجديد يستاهل الواحد يتكلم عنه .

وحسب ماعرفت ان فيه دراسات اتعملت لمده سنة عشان يعرفوا ايه اللي ممكن يجذب الناس لمسلسل زي ده ومش عارف الكلام ده حقيقي ولا لا

القصة : عدد من الشباب في احدي الجامعات الخاصة في مصر منهم العرب والمصريين ...اخوات واصحاب ادمان علي حب علي سرقة علي كرة قدم .. خلطة واقعية وممكن تكون جديدة علي البيوت .

صعب اتكلم عن كاتب محدد لان المسلسل معتمد (زي معظم المسلسلات من النوعية دي) علي ورش الكتابة الجماعية .... بس المسلسل في مجمله حلقات قوية قوي في التصاعد الدراما وحلقات بتعدي مرور الكرام

يعيب العمل علي المستوي القصصي انه متوقع اني اصدق ان دي الجامعة بجد في بلد زي مصر معطم جامعاتها حكومية حتي لو نفس المشاكل بس الطبقة مختلفة

يبقي صعب نقول المسلسل ده موجهة للكل ...المسلسل موجهة لطبقة الجامعات الخاصة والعرب تحديدا كمان اللي بيجوا هنا عشان يكملوا دراستهم الجامعية

ولذلك المسلسل حتي اتعرض علي شاشة الـ MBC

طبعا كنت افضل يبقي بيتكلم عن الجامعات العادية افضل وهتلاقي فيه نفس الدراما وبعيدة عن الكليشيهات برضه .

اهم شئ انه 15 حلقة وبعد تماما عن مسالة الجواز العرفي او النوع ده اللي مبيتعرضش غيره في المسلسلات

الاخراج (هاني خليفة) اخرج معظم العمل تقريبا باسثناء بعض الحلقات اللي اخرجها (عمرو قورة) فالمجمل الاخراج اجمل ما في العمل ...قيادة طقم ممثلين شباب تقريبا اول مرة تمثيل باستثناءات بسيطة منهم

يعيب بس الطقم اني كنت مستكبر سن ناهد السباعي انها تكون طالبة في جامعة لو معيدة كنت اعديها .

صورة العمل في المجمل رائعة ومريحة قوي للعين ولايقة قوي علي الجو العام للعمل ككل ومحاولة مزج مزيكا جديدة ومونتاج جديد شايفها مغامرة تحسب لهاني خليفة وخصوصا انا بنسبة كبيرة قوي نجحت بالنسبة ليا علي الاقل

المزيكا (اشراف هشام نزية): ككل كويس قوي يعيبها بس استخدام الجيتارات كتير في احدي الحلقات الاخيرة كانت منفرة قوي للاذن وانا بتفرج بس غير كده حسيتها قريبة قوي من المسلسل

ستايلست (خالد عزام) قليل قوي لما اكتب عن ملابس او اخد بالي منها بالشكل ده بس الحقيقة مفيش شخصية ملابسها مكنتش بتعبر عنها حتي من غير ما تبقي عندك خلفية عن الشخصية وبان ده قوي في الحلقات الاخيرة جدا ..ببساطة هايل .

مدير التصوير (كريم الحكيم) معتقدتش العمل ممكن يكون بشكل تاني غير الطريقة دي ... حلو واقعي من غير فذلكة ... كان بيعجبني قوي مشاهد مباريات الكرة والمشاهد اللي فيها حركة بالكاميرا كتير

التمثيل : بما ان الطقم كله شباب جداد فهحاول انجز لانهم كتير قوي وصعب احصرهم .

كارمن بصبيص (ريما حداد) لو قلنا شكلا فهي مزة و وشها جميل قدام الكاميرا بس كتمثيل المشاهد الدرامية مكنتش بتاثر خالص وكنت عادي ولا كان فيه شئ منها ...محتاجة شوية مجهود ..لان التمثيل مش شكل ولكنة لبنانية .

حوارها مع امها اللبنانية كنت بحس اني بتفرج علي مسلسل تركي مدبلج !!!

نادية خيري (ملك الخطيب) من الشخصيات اللي اتكتب حلو قوي فالمسلسل وادائها فاخر حلقة كان هايل للغاية

اسامة جاويش(يوسف) الصراحة مكنتش مقتنع بالممثل نهائيا الا في بعض اللقطات لكن في المجمل محسيتش بشخصية المدمن ...كليشيهات قوي فالاداء

يحي الدقن(احمد زكريا) شخصية درامية سخيفة بس اداء علي قد المطلوب منه كممثل

مني هلا : المفروض الشخصية بوجهين وجة سئ و وجة كويس الحقيقة انا طول العمل مش بشوف غير السء ومنتظرها تتصرف تصرفات عدوانية طول العمل اعتقد ده مش تمثيل ده من عدم تقبلي لمني عموما

ناهد السباعي : ممثلة هايلة وبحبها جدا يعيب بس الدور اني مصدقتش سنها وانها طالبة في جامعة مش اكتر

شريف حسن (تامر) : شخصية سخيفة وبعبع المسلسل بس الاداء هايل لاني كرهته فعلا فالعمل وده دليل علي انه مثل كويس ...او انه رخم فعلا J

عبد العزيز المليفي (ياسر البنان) / ريهام الكابلي(سمر البنان) : اخوات والحقيقة اني محسيتش لحظة بالفرق والاداء هادئ قوي من الاتنين ...اختيار موفق للشخصيتين دول

خليت اخر اتنين هما ااقرب شخصيتين ليا :

احمد الجندي (اسماعيل) اللي هو عبيط المسلسل ...اداء حلو جدا جدا من احمد وردود فعل واستخدام هايل لتعبيرات الوش .

عايدة الكاشف(ماريان) مكنش مقتنع قبل ما اشوف المسلسل وقلت ايه جاب الاخراج للتثميل بس اعتقد دي من انجح اختيارات هاني خليفة لاني صدقتها قوي بشكل مش طبيعي !!!

المسلسل في المجمل حلو بس زي ما قلت هو موجهة لطبقة بعينها ولجو المراهقين ومشاهدي القنوات العربية مش المصرية وده ميعيبش العمل ...في اعمال بتبقي موجهة لفئة من الناس ..بس يعيبه تعميم فكرة ان دي الجامعة ككل ... لان الجامعات التانية مشاكلها مش اني العب كورة في اوروبا او انشر رواية وبس .

والمسلسل مسني بشكل شخصي مش تجارب ممثلة قد ما انا حسيتي شخصيتي جزء من عمل زي ده ودي قليل قوي اما احسها من ناحية اي عمل فني ... عمل خلاني احس اني عاوز اشارك فيه .

المسلسل ياخد 6/10 كمسلسل وسعيد قوي بتجربة زي دي من هاني خليفة واعتقد المسلسل هيبقي بنظام مواسم لان النهاية مش مفتوحة هي نهاية لجزء تاني .

Frames

2011-09-17T04:44:00.000-07:00

Nostalghia (1983) - Andrey Tarkovskiy

Dekalog (TV mini-series 1989) The Decalogue E 2 - Krzysztof Kieslowski

Cinema Paradiso (1988) 1 - Giuseppe Tornatore

Cinema Paradiso (1988) 2 - Giuseppe Tornatore

Osama (2003)- Siddiq Barmak

Stalker (1979) 1 - Andrey Tarkovskiy

Stalker (1979) 2 - Andrey Tarkovskiy

Stalker (1979) 3 - Andrey Tarkovskiy

دي بعض اللقطات من افلام منوعة ممكن افضل ببصلها بالساعات من جمال تكوينها والوانها !!
هي دي السينما

بيبو وبشير

2011-09-02T01:24:00.000-07:00

بيبو وبشير

ده باينه مرار طافح .... جملة كان بيقولها احمد مكي في الكبير قوي وتقريبا الجملة الوحيدة اللي كانت في دماغي وانا بشوف الفيلم اللي الحقيقة مش فاهم هو ازاي كده

اعلان الفيلم : مبدئيا الاعلان الشئ السئ اللي فيه انه بيديك فكرة ان الفيلم من النوعية الرياضية وشغل اسر ياسين في الفيلم بس للاسف في الفيلم هما مش قاصدين كده يعني مفيش تركيز قوي علي مهنته بس الاعلان بيديك ايحاء بالعكس

القصة : ولد نصه مصري ونصه تنزاني اسمه بشير بيسيب بيت ابوه ويسكن في شقة بالصدفة مع بنت تانية اللي هي بيبو واللي المفروض طول احداث الفيلم ميعرفوش انهم ساكنين مع بعض وبيتقابلوا ويحبوا بعض بعيدا خالص انهم ساكنين مع بعض !!

ومشاهد غريبة زي ان في لحظة الذورة الموضوع بدل ما يبقي كوميدي او درامي بقي خناقة علي شغلة بيبو انها طبالة

او مشهد الختام اللي هاني عادل اللي طول احداث الفيلم محروق من اسر ياسين وبيحضر الماتش وفرحان عادي !! ولا دي الوطنية يعني ؟؟

التاليف (هشام ماجد / كريم فهمي) : الفيلم منحوت من كذا فيلم بس بشكل عصري شوية يعني مدي علي غريب في بيتي بتاع سعاد حسني علي شوية من نهاية فيلم العالمي وكل افلام الرياضية علي شوية من فيلم الشقة من حق الزوجة لدرجة تكرار مشهد الغسيل بتاع محمود عبد العزيز اللي بيعتبر ماستر سين بالنص في الفيلم بلا اي مبرر درامي او كوميدي حتي !!!

فكرة الشخصيات حلوة بس الفيلم نفسه معجبنيش ومضحكتش للاسف زي ما كنت متوقع !!

الاخراج (مريم ابو عوف) : اول عمل واحنا عارفين اول عمل يا يرفعك قوي يا ينزلك تحت ومعايا وصلنا لتحت من اول تتر البداية اللي كان فيه الصورة بتنغبش شوية (بحاول اجيب كلام يتفهم) وده مكنش ليه اي مبرر بالعكس وجعلي عينيا

مع ان كمان في راكورات غريبة زي انهم يمشوا بالعربية كتير قوي ويحششوا وبرضه الاغنية بتاعت لولاكي شغالة هي هي وبتكمل بعضها مفهمتهاش ...

يعني ببساطة الشئ اللي يحسب بجد الوان الفيلم مبهجة واختيار الممثل اللي لعب صاحب اسر ياسين (بس للاسف فشلت اجيب اسمه)

الموسيقي التصويرية (هاني عادل) سئية ومعجبتنيش بالعكس اخر مشاهد كانت باينة انها منفرة وبعيدة عن المشهد تماما

التمثيل :

عزت ابو عوف وصفية العمري : المعتاد والعادي قوي قوي ...بس عزت ابو عوف كان بيفكرني بعمرو وسلمي قوي

هاني عادل : عادي جدا والصراحة مش بحسه ممثل قوي وهو ادؤاه كان حقيقي لانه بيمثل انه مغني في فرقة ففل ...بس اخراج الاغنية في الفيلم سئ للغاية وطبعا اخراجيا

منه شلبي : شكلا معجبنيش اللوك اصلا والشعر الكيرلي والجو ده ..اداءا بقي معتقدتش منه يجي منها كوميدي زي الدراما ...الصراحة مكنتش بستطعم الايفيهات

اسر ياسين : العكس بقي اسر يجي منه كوميدي بس طول الفيلم بحس انه بيضحك بجد مش فاهم ليه !! ولا هو معرفش يجي الوش الجد مش عارف بس فعليا مش ده الاداء اللي كنت منتظره

اخيرا الاتنين بس اللي عاجبوني في الفيلم

محمد خان : ظروف رائع وممتع لمخرج بحبه وممثل لذيذ ويجي منه كوميدي قوي

بجد انبسطت من وجوده في الفيلم

حماده (صاحب اسر وفشلت اجيب اسمه) تقريبا اول مرة اشوفه بيمثل ..الدور بتاعه اوفر في الكتابة بس فعليا هو ادؤاه عاجبني جدا وعرف يضحكني مرة او اتنين في الفيلم بس كاداء مش ايفيهات

النهاية الفيلم كنت متوقعة احلي وافضل من كده بس محصلش بديله تقريبا 3/10

لبعض الحاجات اللي بسطني بس للاسف هما قليلين قوي ...وتتعوض في اي فيلم تاني بقي .

الفاجومي

2011-06-22T03:10:00.000-07:00

بعتذر فيه مشكلة في رفع الصور علي بلوجر فالموضوع من غير صور

- الفاجومي

صناعة فيلم عن احمد فؤاد نجم وبالطبع رفيق الدرب الشيخ امام هو بالتأكيد عمل مهم ويستحق الانتظار ... وتزامنه مع الثورة اللي استخدمت فيها اغاني نجم وامام في الميدان كمحفز للشباب اكبر دليل علي قوة واستمرارية شعر نجم واهميته وقمته الشعرية .

وبالتاكيد عمل زي ده يدفعك لمشاهدته

الاعلان : يمكن واحد من اسوء اعلانات الافلام اللي شفتها بقالي مده ..اعلان ملي بستات وحشيش وصوت عالي وفي النهاية جزء ثوري ... تسويق فج لعمل المفروض انه يتسوق بطريقة ابسط من كده ...

القصة والسيناريو : العمل متاخد من مذكرات الفاجومي ... لكن العمل بلا مبرر اتكتب باسماء اخري زي ادهم نسر والشيخ همام بلا مبرر منطقي واحد لتغير اسماء الشخصيات كان يعيبها العمل او ما يصوره العمل من افعالهم ... مع ان المرفوض العمل منقول من بعض الشخصيات !!

وده ينقلنا لجزء اخري الا ان السيناريو ده محستوش انه سيناريو اصلا ده مجموعة مشاهد متركبة متقطعة من فيلم طويل بس محدش عارف الفيلم ده هيتعرض امتي

خصوصا ان الفواصل الزمنية بين المشاهد وبعضها كتير ومش رابطها اي رابط يخليك تكمل مشاهدة وانت فاهم ايه حصل بالظبط

الاخراج (عصام الشماع) : اخراجيا ميختلفش كتير عن السيناريو بس يزيد عليه سؤء اختيار طقم الممثلين وسوء توجيهم وسوء الشكل النهائي للعمل

فالمونتاج مثلا نقلاته كرهتني في الفيلم ولقطات كتير لجيهان فاضل حسيت انها بتضحك فعليا وان المشاهد متاخدة في قعدة مش تمثيل واهتمام بالشخصية اللي بتتمثل ولقطات كتير بدل ما تتطلع بالشكل المنتظر منه زي مشهد تنحي ناصر ... اللي شوفته كوميدي جدااا وتحوير النداء الاشهر ل( حا حا )

ومشهد مظاهرات الطلبه اللي كان خناقة مش زي ما قرينا (بما اني مشوفهاش شخصيا) عن عظمتها في حينها !!

مش هاتكلم عن تفاصيل التصوير او غيره علي اساس اني مجرد مشاهد فقط مليش في التفاصيل الفنية دي ... !!!

المزيكا والاغاني : لا انكر تحيزي الشديد واعجابي بـ( أحمد سعد) كصوت واداء ولكني مش مسامح في التوزيع السئ للغاية لاغاني الشيخ امام ... واحمد سعد ظلم نفسه بقبوله المخاطرة دي لان اغاني زي (ديستان) وهو بيقلد لدغة الشيخ امام فكان واضح قوي انه بيقلد الشيخ امام مش اللدغة المقصودة ... ببساطة شريط اغاني الفيلم لم يتختلف كثيرا عن الفيلم ..الميزة الوحيدة ان اللي ميعرفش الشيخ امام هيدور عشان يسمع اغانيه ويعرفه وساعتها المقارنة فعلا مش هتكون في صالح سعد.

التمثيل : ولا حرج :

بعيدا عن مقارنة الشخصيات الحقيقة بالممثلين ...فمبدئيا الوحيدة في الفيلم اللي في تمثيلها هدوء واقنعتني انها بتقوم بدور واجتهاد هي (كنده علوش) اللي قامت بدور صافيناز كاظم

وممكن نضيف بعض الاجتهادات من (فرح يوسف)

اما باقي طقم التمثيل :

جيهان فاضل : اسوء تمثيل هو اللي الممثل يقنعك انه (بيمثل) بالمعني الشبابي اللي هو تقومي بدور مش دورك وهو ده نفسي احساسي من دورك في الفيلم

صلاح عبد الله : هو الشيخ امام بس مكنش اعمي ...يعني ده مش اعمي تقليدي

حسيت الدور عادي جدا بالعكس اجتهدت فافلام ااقل من مستوي العمل ده لو كنت تعبت شوية يمكن كان الوضع اختلف

خالد الصاوي : محدش ينكر مواهبتك بس الاختلافات الجسمنية الرهيبة بين وبين نجم مع سوء السيناريو خلاني طول الوقت كاره الفيلم والطقم كله ... يمكن بعض الاشعار اللي القيتها (البعض مش الكل) كانت لذيذة لطريقة الالقاء مش اكثر

من الاخر تقييمي للفيلم 0/10 يمكن لاني كنت اتمني خير في فيلم زي ده وخصوصا بعد الثورة وكان هيكون ليه دور كويس ... لكن ببساطة النوايا الطيبة لا تصنع فيلم جيد

The Eloquent Peasant - Shadi Abdel Salam /شكاوى الفلاح الفصيح - شادي عبد السلام 1970

2011-06-04T05:23:00.000-07:00

The Eloquent Peasant - Shadi Abdel Salam /شكاوى الفلاح الفصيح - شادي عبد السلام from Ahmad on Vimeo.

انتاج مركز الفيلم التجريبي بالقاهرة

جائزة مهرجان فينيسيا الكبرى ١٩٧٠
من الأدب الفرعوني للدولة الوسطى سنة ٢٢٠٠ قبل الميلاد

The Eloquent Peasant
Director and Script: Shadi Abdel Salam
1970

الممثلون:
أحمد مرعي - الفلاح
أحمد عنان - الحاكم
أحمد حجازي - تحوت ناخت

مونتاج: كمال أبو العلا

ديكور: صلاح مرعي

موسيقى : سليمان الطويل

مدير التصوير: مصطفى إمام
١٩٧٠ From The ancient Egyptian Literature
سيناريو و إخراج: شادي عبد السلام

اعتذار وقصيدة سينمائية

2011-01-16T14:30:00.000-08:00

سوري علي التاخير وعدم النشر من مدة بس الظروف الموجودة علي الساحة كانت اكبر من اني اكتب اي شئ

وده لينك لقصيدة عن فيلم اليوم السدس لشاهين علي مدونتي التانية بس بما ان الموضوع سينمائي برضه فحبيت اشارككم بالقصيدة

انقر هنــــــــــــــــــــــــــا

http://elbald-dy.blogspot.com/2011/01/blog-post.html

The Social Network

2010-12-21T14:54:00.000-08:00

The Social Network

ينفع للى أكبر من 16 سنة، علشان بس يفهم الكلام اللى بيتقال

Release date: September 2010 (USA), October 2010 (Egypt)

الفيلم ماكانش محتاج تشجيع علشان اشوفه ..
هو صحيح اخراج ديفيد فينشر، وده كفيل اني اشوف الفيلم وانا مغمض ... بس اصلا الفيلم بيدور حول الشئ اللي قلب دماغ العالم الفترة اللي فاتت ... اللي هو الفيس بوك ... سواء كنت بتحب الفيس او لا هتشوف الفيلم، وده طبيعي قوي.

القصة : ازاي وليه مارك زوكربيرج أنشأ الفيس بوك، و ازاي ابتدي من مجرد موقع لجمع صور "بنات هارفارد"، ثم بعدها اتعرف الموقع في كل انحاء العالم. و بتمر بينا القصة على الناس اللي قلبهم في الفكرة، او اللي هما قالوا عنه إنه قلبهم ... و اصحابه اللي سابهم، او اللي فضلوا معاه ..
و كل السياق ده بيقطعه جلسات تشبه جلسات المحكمة، بتجمعه بينه وبين اصحاب الفكرة وصاحبه اللي ساعده بالفلوس وسحب منه نسبته في الشركة بعد كده.

الفيلم، بالنسبة ليا، ماعرفتش احدد هو حلو ولا لا ... لكذا سبب:
اهمهم اني من اول مشهد ماكنتش متعاطف مع مارك نهائياً، لانه ببساطه كان طالع في الفيلم وغد (حسب ترجمة انيس عبيد) ... يعني بارتباكه وقلة خبرته البنت اللي اعجب بيها سابته في اول مشهد، راح فضحها فضيحة تمام علي البلوج بتاعه ..
وبعدين راح عمل هاك علي سيرفر الجامعة وقعه، وبعدين التوأم، اللى فى الفيلم مش اللى فى ميت عقبة، اقترحوا عليه موقع معين، راح معدل الفكر وعمل الفيس بوك ونفض لهم ... وحتي صاحبه الي ساعده بفلوس "حلق له" صح !!
طبعاً هو في الآخر بيقول انه عمل تسوية بمبالغ عملاقة ... بس ماكتبوش صاحبه اللي ساعده ده، اللي كان ليه في الاصل 30%، اتراضي بكام ... اعتقد بمبالغ ماتتكتبش، بس عادي بالنسبة لابو مارك اصغر بليونير في الارض.
طيب شخصية زي دي (وانا العادي بتاعى انى بحب افلام السيرة الذاتية) هاخده كمثل أعلى او اتعاطف معاه ليه ؟
انا ماحبتش الشخصية نهائياً، بالعكس كرهتها اكتر ... وكرهت ردود افعاله بعد الفيلم انه ماعلقش، وراح اتبرع بـ500 مليون دولار تقريباً للمدارس قبل الفيلم ماينزل بوقت قليل ..

فهل ده على سبيل تحسين صورته يعني ولا ايه ؟؟؟ مش فاهم ..
و حتى لما اتسال عن الفيلم قال: هو فيلم خيالي لذيذ :) !!

في جملة اتقالته من بنت في اخر مشهد لخصت الموضوع بجد:
u r not an asshole...but u r trying so hard to be that
ترجمة انيس عبيد : انت ليس وغد ولكن تحاول جاهدا ان تكون كذلك

بس مع شوبة تفكير برضه هنلاقي ان "الاختراع" ده فعلا آثر على البشر بدرجة رهيبة، لدرجة ان نص المعلومات اللي عرفتها عن الفيلم كانت من الفيس بوك نفسه ... سواء بلينكات "متشييره" او بصور، او حتي اني اعجب بالفيلم اللي له صفحات كتيرة رغم اختلافه مع صاحب الموقع نفسه.
ده خلاني اسال ايه الشخصية الغريبة اللي قدرت تجمع كل البشر دول، وتعرف اهتماتهم ... وتحدث نفسها وتفضل علي القمة لمدة طويلة، والموقع اللي ابتدي بـ 2000 دولار اتعرض بملايين ويمكن مليارت لبيعه، او حتي للدخول بنسبة فيه ... ومع ذلك بيرفض لانه اساسا كده كده بيجيب المبالغ دى.

we lived in farms ,then we lived in cities,now we gonna live in the internet
عشنا في مزارع وبعد كده في مدن، دلوقتي هنعيش علي الانترنت

اعتقد ده سبب كافي ان واحد من قلة قليلة، بقى من اباطرة الشبكة دي ..
يعنى ضرورى يتعمل عنه فيلم حتي لو كان فعلا (وغد)!!

السيناريو متاخد من كتاب اصلا بيحكي قصة الفيس بوك لـ Aaron Sorkin، و السيناريو الحقيقة كان بطئ في الساعة الاولي ... ويمكن ساعات ممل، بس محاولات المخرج ديفيد فينشر انقذت الموضوع شويتين. بس ده يمكن لان القصة نفسها احداثها مش بالاثارة اللي كنت متصورها .

الإخراج David Fincher : من المخرجين المفضلين عندى، و مؤمن تماما ان الراجل ده مش بيحط ايديه في فيلم الا وهو عارف ومتأكد ان الفيلم ده يستاهل ... لانه عدي مرحلة السبوبة من زمان. هو أخرج قبل كده The Curious Case of Benjamin Button و Zodiac ، و Se7en و Panic Room و Fight Club ... يعنى مخرج تقيل.
و الفيلم اخراجيا حلو قوي، واختيار طاقم الممثلين في الجون من الآخر.

التمثيل :

Jesse Eisenberg: الوغد مارك ... والحقيقة هو كان في الفيلم رائع تمثيلاً، وحتي اللقطات اللي الواحد بيحاول يتعاطف معاه فيها كانت حلوة، بس انا مقدرتش الصراحة.

Andrew Garfield: سافرين (صاحبه والممول الاول للفيس بوك) تقريبا الممثل الوحيد الجيد كتمثيل، و بيؤدى شخصية اقدر اتعاطف معاها بشكل ما ... وهو مع فينشر صبروني اكمل للآخر.

الفيلم واخد تقييم 8،4/10 وفي المركز 112 .. و هو مرشح لـ 6 جوائز جولدن جلوب فى 2011، منهم أفضل فيلم و إخراج و سيناريو و ممثل و ممثل مساعد و موسيقى تصويرية.
انا بدليه 6،5/10 ... و هو فيلم يتشاف اكيد، بس الحقيقة برضة انا لسه محتار ازاي اتعاطف مع (وغد) ؟؟

Quentin Tarantino .part 3

2010-12-14T14:33:00.000-08:00

اخر جزء عن تارنتينو (الجزء الاول - الجزء التاني)

قتل بيل 1 Kill Bill 1 2003:

سلسلة افلام دموية ... وقبل اي كلام، هو في لقاء مع الجمهور اتسأل: "انت مش خايف لطفل من الاطفال يقلد الفيلم ويقتل زمايله او اي شئ من الحاجات دي ؟" ... فكان كان رده: "بالعكس الشىء اللي هيتعلموه من الفيلم ... انهم يعملوا افلام" !!

الفيلم ده كان مكتوب لإيما ثرمان مخصوص، وهو عبارة عن حكاية اتقالت وسط احداث فيلم "بالب فيكشن" وهو حولها لفيلم مستقل (ابتديت احس ان الراجل ده عمل فيلمين وعامل يستفيد منهم وبس) ... بس هما كانوا ساعة التصوير كانوا بيتكلموا عن الافلام اللي نفسهم يعملوها، وكان تارنتينو نفسه يعمل فيلم كونغ فو سبعيناتي وهي كانت عاجباها الفكرة ... و الموضوع اتنفذ بعديها بـ9 سنين لأن السيناريو لوحده اتكتب في 6 سنين، وكان الجزئين علي بعض بس هو فصلهم بعد كده .

وكان مرشح لدور (بيل) كيفين كوستنر بس كان بيصور فيلم تاني ورفض الدور، وقال مرة في لقاء: "لو بروس لي كان عايش كان هيخليه يمثل الفيلم باي شكل من الاشكال". وبعت لـ روبرت ريتشاردسون (المصور) السيناريو يوم عيد الحب 2002 مع بوكية ورد عشان يخليه يقبله !!

الفيلم في جزء منه اتصور في ستوديو في هونج كونج، لمجرد ان تارنتينو شاف كام فيلم اتصوروا هناك وعجبه المكان فقرر يصور فيه هو كمان !! و كان في وسط التصوير بيكتب مشاهد كاملة جديدة ... مش تعديل ... لا هو كتب مشاهد كاملة (بس للاسف مش عارف انهي مشاهد تحديدا) بس الفكرة انه ممكن ببساطة مشهد جديد محشور يعمل ازمة، لكن مع ده مفيش مشاكل، كله بيتظبط.

و قد استخدموا في الفيلم 450 جالون دم مزيف ... هاسيبك تدور قيمة الجالون دي قد ايه ... واكتر كلمة كوميدية اتقالت عن الفيلم ان ده اقل فيلم اتقالت فيه كلمة (F)، اتقالت بس 17 مرة وده رقم قياسي بالنسبة ليه (اغلب افلامه بتعدي الرقم ده).

ملحوظة: الفرقة بتاعة المطعم كان فيها 3 عازفين حافيين، وده هيخليني اقول ان كل افلام تارنتينو فيها لقطة او اكتر لازم ولابد حد يطلع حافي فيها .. اشهرهم ايما في بالب فيكشن.

الفيلم اتكلف 55 مليون دولار وجاب 70 مليون، منهم 60 الف دولار (بس) اتصرفوا على السيوف و السكاكين !!!
تقيمي للفيلم 7.5/10 ... معلهش انا دموي شوية

اقتل بيل 2 Kill Bill 2 2004 :

الجزء ده عمل الموسيقي التصويرية فيه انتيمه "رودريجز" مقابل 1 دولار !! (حاجة كده زى إن مهرك 25 قرش)، وبعدها لما تارنتينو اخرج مشهد في (مدينة الخطئية 2005) لرودريجز خد عن المشهد 1 دولار برضة !!

الفيلم ده كان اصلا زي ماقلت باقي الجزء الاول، علشان كده كمية الجثث والقتل اللي اتشاف علي الشاشة تكاد تكون قليلة قوي ... اول جزء فيه كان فيه حوالي 41 جثة (مش انا اللي عدتهم اكيد) والتاني 3 جثث بس ليهم مشاهد قتل، وكل القتلي في الفيلم اتقتلوا عن طريقة بنت مش راجل.

و لما اتسال مؤخرا، بعد هوجة الثري دي، عن ايه كان ممكن يعمله من افلامه كده قال: "لا ماعتقدتش، بس اقتل بيل كان ممكن علي الاقل الصوت والمزيكا يبقوا ثري دي" (أنا مش متصور الدموية دي كلها تبقي ثري دي).

الفيلم اتكلف 30 مليون دولار وجاب 66 مليون ... وحاليا مشروع تارنتينو الجديد الجزء التالت من اقتل بيل.

ضد الموت 2007 Death Proof :

ده تاني فيلم بعتبره هزار، مالوش تفسير غير ان تارنتينو بيهزر .. فيلم سبعيناتي (اوي من البي موفي) عن واحد من اللي بيعملوا الحركات الخطرة بالعربيات في الافلام ماشي ... معاه عربية من العربيات دي وبيقتل الناس. و فى الفيلم مشاهد قتل دموية و لكنها ضحك بالنسبة ليا، مش جنون منى ... بس اسلوب تارنتينو في الفيلم كان فعلا سبيعناتي زيادة عن اللزوم.

الفيلم كان زي جزئين علي بعض، و النص التاني كتابة واخراج رودريجز ... وهو فيلم رعب اكشن سبعيناتي برضه (Planet Terror) و فيه لقطات بين الفيلمين فيهم اختلاط، يعني فية ممثلة من فيلم روديجز ظهرت في مشهد من فيلم تارنتينو وهكذا ..

بس فكرة الفيلم نفسها جت منين (علي لسان تارنتينو) إنه كان عاوز يشتري عربية محترمة عشان مايموتش في حادثة (زي اللي عملها في بالب فاكشن) ... فراح مع واحد صاحبه يشتري عربية فولفو لانها عربية امنة بشكل كبير، فبيحكي لصاحبه راح قال له: أأمن ليك تدفع 10 أو 15 الف دولار واعمل عربية (ضد الموت) ... وساعتها الفكرة رشقت في دماغه وعملها فيلم بعد كده.

و كانت من احد ابطال الفيلم (زوزو نبيل ... عفواً زوو بيل) و هي نفسها اللي كانت الدوبلير بتاعة ايما ثرمان في (اقتل بيل) ... و فى هذا الفيلم، فى نسخته المطولة، كلمة (F) اتقالت 148 مرة، يعنى رجع لمعدلاته الطبيعية. و هو لما اتسأل عن الفيلم قال: "هو مش قوي، ومش فيلم للدرجة بس بحبه".

الفيلم تقييمه عندى 5/10، لذيذ باعتبار ان تارنتينو بيهزر مش اكتر ... وده كله هزار عشان اللي جاي بقي.

انجلرويس باستردز (ترجمتها بالعربي مش منطقية ليا) 2009 Inglorious Basterds :

الفيلم ده من اجمد الافلام اللي شفتها، علشان، بعيدا عن اسلوب الكتابة والاحداث، كفاية ان عنده الجرأة انه ياخد حقيقة تاريخية ويغيرها تماما ... و يخترع موضوع قتل هتلر اثناء الحرب فى فرنسا !.

الفيلم قعد يكتبه فى 10 سنين، وكان ابتدي فيه قبل (اقتل بيل) بس قرر يكمله بعدين، لانه ماكنش معجب بالنهاية. و من اغرب الترشيحات اللي سمعتها انه عرض علي ادم ساندلر دور في الفيلم !!! و لكنه رفض عشان كان بيكتب فيلم تاني ... و الدور عمله بعد كده (الاي روث) و حتى ايدي ميرفي كان عاوز دور في الفيلم.

والفيلم الي ظهر بيتعرض في السينما في مشهد النهاية كان من اخراج (الاي روث) نفسه، و اللي عرض عليه تارنتينو يخرجه ... و الصوت فى الفيلم نفسه كان صوت تارنتينو !!! و برضة شخصة (الاى روث) في الفيلم (دوني دونوينتز) هى نفسها شخصية ابن (لي دونوينتز) و اللي ظهرت في فيلم (رومانسية حقيقة 1993) !!!

تارنتينو نفسه ظهر في الفيلم بس كجثة (عروسة علي شكل تارنتينو)، فى اول مشهد لمجموعة براد بيت وهما بيعذبوا الضابط الالماني ... ودور (هانز لاندا/كريستفور والتز) كان مرشح له ليناردو دي كابريو .. بس ماعتقدتش اي حد هيعمل الاداء الرهيب ده (خصوصا ان الدور ده من اجمد الادوار اللي شفتها مكتوبة، زي الجوكر في فيلم نولان، و زي د.ليكتر في صمت الحملان) ... شخصية مركبة وماتخلقتش غير علشان اداء ممثل واحد بس، وكفاية انه اتكلم 4 لغات في الفيلم بطلاقة واجادة تامة.

الفيلم كان 3 ساعات و10 دقايق واتقص قبل العرض بيومين وبقي ساعتين ونص، واسم البلد اللي جه منها الدو رين/براد بيت، هي نفس البلد اللي اتولد فيها تارنتينو ... واللي كانت مكتوبة علي بوستر الفيلم علي عصاية البيسبول، واللي كذلك هي البلد اللي كان بروس ويلز في بالب فيكشن اشتري منها الساعة بتاعته (دي ظهرت في اغلب افلامه).

واغرب ايفيه بيعمله من اول (اقتل بيل 1) لغاية الفيلم ده انه بيخلي في نهاية كل لقطة الممثل يقول (هالو سالي) اللي هي (سالي مينكي) مونتيرة كل افلامه، اللي هي بالمناسبة رفضت تمنتج اول فيلم وبعد كده اقنعها ... وكل افلامه هي اللي منتجتها بعد كده.

اول مشهد في الفيلم اللى فيه الظابط الألمانى بيستجوب الرجل الفرنسي هو افضل ما كتب تارنتينو، باعترافه شخصيا، رغم انى انا شايف ان حوار بالب فيكشن بنفس القوة.

الفيلم تقييمي له 9/10، وبستمتع بيه جدا وخصوصا مزيكته اللى من موسيقي السبيعنات، اللي زي كل افلام تارنتينو اللى بيختارها من مكتبتة الخاصة.

-------------

دي تقريبا اغلب الحاجات اللى ممكن تتقال عن اهم افلامه، بس المميز بقي واللي لازم يظهر في كل افلامه هو:

1- ممثلة لازم تظهر حافية.
2- لازم شخص يستخدم ولاعة زييبو.
3- كل افلامه فيها ممثل او اكتر من الممثلين القدام اللي مابقوش يمثلوا، ودي بحبها فيه قوي لانها فيها انسانية
4- كل افلامه، باستثناء اخر فيلم، لازم يبقي فيها عربية جنرال موتوز وهوندا سيفيك بيضاء.
5- اغلب شغله سبعيناتي بشكل او باخر.

-----------

أخيراً بالنسبة لتارنتينو انا بحبه، بس اغلب اعجاب الناس بيه بسبب طريقة اللوحات المنفصلة في وسط الفيلم، واسلوب اختيار الممثلين واللسعان ده ... ودي حقيقة موجودة عندنا في مصر من قبل تارنتينو بعشرين سنة، في مخرج مصري راحل اسمه (محمد شبل) اللي ماعملوش غير 4 افلام (انياب – التعويذة – كابوس - غرام وانتقام بالساطور) ... و فيلم تسجيلي غير مكتمل عن يوسف شاهين (توفي وهو بيمنتجه).

الرجل ده كان عنده نفس حالة الهسس في الافلام، بس الفارق انه بيجيب افكار حلوة قوي قوي ومجنونة ... بس هو سيناريست ومخرج ضعيف للغاية، و اعتقد اي حد هيشوف افلامه هيعرف ... خصوصا فيلم (كابوس) ... بس للاسف الفيلم مش موجود ومش عارف السبب والنسخة اللي عندي من اردأ مايكون !!

كل الكلام اللى فات ده ينطبق الى حد كبير على تارنتينو برضة ... هذا التارنتينو اللى مطالع تارنتينى ..

بس كفاية كده عليه ... لان لسه فيه مخرجين تانين أحب اتكلم عنهم !

Quentin Tarantino .part 2

2010-12-07T15:14:00.000-08:00

تاني جزء من ثلاثية تارنتينو معايا :) (الجزء الاول)

Pulp Fiction 1994 :

هو فيلمه التاني والاشهر، فاز عنه بالاوسكار و احسن فيلم فى مهرجان كان، و42 جايزة تانيه ده غير 40 ترشيح ... وحصل الفيلم على المركز السادس ضمن افضل 250 فيلم. و مش هحلل الفيلم لان تقريبا مافيش حد ماشافوش، وسواء عجبه او لا فمافيش حد قدر ينفي انبهاره بالتفاصيل وطريقة السرد، اللي تعتبر طريقة مكتوبة علي اسم تارنتينو.
و رغم ترشيحات الفيلم لكذا اوسكار، بس هو أخد الجايزة عن افضل سيناريو لتارنتينو و روجر افري ..
تارنتينو قبل اول فيلمين له، كان مخلص فعلا جزئين او حكايتين من الفيلم (اللي بينقسم لتلات قصص متداخلة بدون ترتيب) وبعد نجاح اول افلامه قرر يكتب تالت جزء ... وكان المفروض كل جزء هيخرجه مخرج مختلف (التجربة اللي عملها بعد كده في فيلم Rooms 4)

دور صامويل جاكسون كان مكتوب مخصوص ليه، بس كان حيروح لممثل تاني ... ولما عرف صامويل هوب آخد اول طيارة وخد الدور ... حاجة كده بالعافية ... و كذلك مقدمة الفيلم حواريا اتكتبت مخصوص لتيم روث ... وكذلك شخصية (الذئب) اتكتبت لهارفي كيتل.
و تارنتينو تقريبا فى اغلب افلامه بيحط في دماغه ممثل لك دور، ويرسم الشخصية باداءه لها ... وده شيىء صعب الحقيقة. و فى الفيلم ده كان دور ترافولتا عاوز يلعبه (دانيل داي لويس) بس تارنتينو هو اللي ادي الدور لترافولتا. وشخصية بوتش الملاكم كان هيعملها سلفستر ستالون او مايك روكي، بس راحت لبروس ويلز اللي اصلا اتضايق لانه كان فاكر انه هيعمل دور فينسنت (ترافولتا) .

وايما ثرمان اصلا كانت رافضة الدور، وهو كان عاوزها هي تحديدا ... فقرالها السيناريو كامل في التليفون عشان توافق!! وفعلا وافقت، قبل ما يفصل شحن ... واصلا في الدور بتاعها، شخصية (مايا والاس)، كانت بتقول انها مثلت حلقة في التلفزيون عن مجموعة من 5 بنات محاربين، كل واحدة متخصصة في نوع من الاسلحة ... و ده كان فعلا جورها بعد كده فى تاني تعاون مع تارنتينو (Kill Bill Volume 1 & 2) وكان نفس التخصص بتاعها هو السكاكين ..
ملحوظة: كان مترشح للدور ميج ريان وميشيل فايفر، بس هو مكنش عاوز غير إيما ثرمان.

أما دور فابيان، وده اغرب ترشيح سمعته، كان المفروض اللي تلعبه ايريني جاكوب ... اللي هي بطلة افلام المخرج كسلوفسكي (Three Colours: Red - La Double Vie de Veronique)

الفيلم اتكلف 8 مليون، منهم 5 مليون بس اجور ممثلين ... و جاب 48 مليون ونص في امريكا بس وقت عرضه.

و المعروف ان الكلمة الأبيحة اللى اولها F، إتقالت 256 مرة فى الفيلم ... و من المصادفات اللى غالباً مقصودة، ان شخصية فينسنت في الفيلم فى كل مرة بيدخل فيها الحمام بتحصل مصيبة (مرة ميا والاس كانت بتموت بجرعة زيادة، ومرة لقى ناس بتسرقهم في مشهد النهاية ... وهو نفسه بيتقتل في حمام وهو بيقرا قصة مصورة) !!!
وهو بيظهر في مشهد البداية وهو رايح برضة الحمام !!! في مشهد ماشفتوش الا بعد خامس مره شفت فيها الفيلم، و بالصدفة البحته ... وشخصية ميا و جوزها ماطلعوش فى ولا مشهد في الفيلم مع بعض، رغم انهم المفروض متجوزين !!

و فيه مشهد محذوف في النهاية، كان المفروض بين صامويل جاكسون وهو بيكلم حرامي كان هيقتله من تحت الترابيزة، وبعد كده هيقتل البنت اللي معاه ... اللي مسدسها هيقع وهتقتل البنت اللي كانت بتصرخ في لقطة من اللقطات ..
وكان المفروض كل ده مجرد تخيل في دماغ صامويل، بس اتحذف المشهد للاسف ... مع اني شايف انه كان هيبقي لذيذ وماشي مع المحادثة اللي بينهم .

تقيمي للفيلم 9/10 وهو من افلامي المفضلة، مش عشان هو وهمي ... لكن علشان بحب اسلوب كتابة الفيلم والسرد، خصوصا ان ترتيب الاحداث ماشي بلا "ادني ترتيب منطقي"، فده مدي طعم للفيلم مختلف عن اي فيلم تاني.

من الغسق للفجر From Dusk Till Dawn 1996 :

هو مش اخراج تارنتينو، بس كتب السيناريو و قام بأحد الأدوار، واخرج الفيلم صديقه الاقرب روبرت رودريجز (الاتنين الصراحة لايقين علي بعض ... مجانين ودمويين و بيعيشوا حالة من اللسعان المشترك)
أنا معرفتي بيه جت عن طريق صديق سينمائي بيحب جدا حالة الجنان اللي زي دي ..
الفيلم ماشي طبيعي، اتنين اخوات بيسرقوا وبيهربوا وعاوزين يوصلوا المكسيك ... و يقابلوا عيلة رايحة فيخطفوها ويهددوا الاب عشان يعديهم معاه، ليقتلوا ابنه وبنته ... ده كده نص الفيلم الاول ..
تاني جزء بيعدوا الحدود ويلاقوا موتيل صغير، و يقرروا يقعدوا شوية وكل واحد يروح في حتة ... علي نص الليل كل الناس اللي في الموتيل بيتحولوا لمصاصين دماء، والمفروض بقي الاتنين دول مع العيلة بيحاولوا يهربوا.
حالة من الجنان الرسمي من تارنتينو في الكتابة ... نص الفيلم مالوش اي علاقة بالنص التاني !!! هي مش قصته صحيح بس الحالة نفسها ماتصدرش غير منه. والغريبة انه خد عن الفيلم ترشيح كافضل ممثل مساعد واحسن سيناريو لجايزة الخيال العلمي وافلام الرعب ... وبرضه اترشح لجايزة اسوأ ممثل مساعد في السنة دي عن نفس الفيلم في جايزة الراتزي (دي جايزة عن كل الاسواء وبس) !!

الفيلم متكلف 18 مليون وجاب 25 مليون ... بس الغريبة مش عارف الـ18 مليون دول راحوا فين ؟؟
الفيلم تحس انه متصور في خرابة وصحرا، والتكلفة بتاعة الابطال ماكنش يأثر فيها غير وجود جورج كلوني وهارفي كيتل، اللي يعتبروا ممثلين اصلاً ... اما الباقي فاي كلام وادوار صغيرة (منهم اول ظهور لسلمي حايك) والمكياج ماكنش عبقري للدرجة ... واصلا فيه مشاهد اتقطعت من افلام سابقة لتارنتينو و رودريجز اختصاراً للوقت والفلوس.

دور كلوني كان معروض كالعادة علي ترافولتا وتيم روث و مايكل مادسن (طقم تارنتينو) ... بس كلهم رفضوا. وكان المفروض تارنتينو هيخرج الفيلم بس قرر يتفرغ للسيناريو والتمثيل ويركز فيهم اكتر !!

الفيلم ده بعتبره مجرد تهريج، بس تهريج لذيذ ... وعشان كده بديله 6/10، كتير بس اعتبره فيلم "كوميدي" عادي يعني!
وعشان نكمل تهريج ... صاحب القصة اصلا قال تارنتينو يعملها فيلم، حاجة شبة تخليص حق كده ... اظن مافيش كوميديا اكتر من كده، خصوصا ان ده اول سيناريو يكتبه بعد اوسكار بالب فيكشن.

جاكي براون 1997 :

هو عن رواية لـ(اليمور ليونارد)، و تارنتينو كتب السيناريو ..
و تكملة للخبطة افلامه، نلاقى نفس المكان اللي كانت البطلة بتاكل فيه هو نفسه اللي ظهر في بالب فيكشن، لما مارسيلاس والاس وقف في الاشارة وخبطه بوتش الملاكم ... ونفس العربية اللي اتخبط بيها هي هي عربية جاكي في الفيلم !!

روبرت فورستار، في اول لقطة وهو خارج من السينما، بيكون نهاية الفيلم اللي شغال هي هي نهاية فيلم جاكي براون!!
وصوت الانسر ماشين بتاع جاكي هو صوت تارنتينو نفسه !!
و دور مايكل كايتون كان المفروض هيعمله برضه ترافولتا وسلفستر ستالون كان عاوز دور روبرت دي نيرو، بس كالعادة بح ... و تارنتينو اختار دي نيرو (اكيد طبعا) !!!!

الفيلم عموما انا اول مرة شوفته حسيت بان تارنتينو بيريح مش بيعمل فيلم يعني لو استثنيت اداء صامويل جاكسون ودي نيرو كان الفيلم هيبقي ااقل من العادي
الفيلم اتكلف 12 مليون وجاب 40 مليون تقريبا ... و تقيمي للفيلم 6/10

Quentin Tarantino .part 1

2010-11-30T12:52:00.000-08:00

ملحوظات قبل البداية :

الموضوع مش اختراع هو قرأت متعددة من مواقع وفيديوهات عنه انا بس حبيت اجمعها في موضوع (وفيه شوية حاجات غريبة عن افلامه وترشيحات ممثليها وترابط افلامه ببعض)

مش موضوع ودراسة وتعمق قد ماهو تسجيل اعجاب ومشاركة بغرائب تارنتينو

تاني حاجة بعتذر لترجمة كل الاسامي الانجليزي واسماء الافلام للعربية في نص الموضوع لغياب التنسيق بين اللغتين ... ومرفق قاموس في نهاية المقال بيه الاسم العربي والمرادف الاجنبي

-----------

فكرت كتير اكتب ايه عن الراجل ده وليه ..مع العلم انه مش مخرجي المفضل بس يعد من اكتر المخرجين اللي بحبهم وبحب اشوف افلامهم ... في يوم قررت اخصص كل يوم لمخرج من المخرجين واشوف كل افلامه اللي عندي رغم اني حافظ معظمها ... بس كان الهدف الاستمتاع بحد بحبه ومش عارف ليه تحديدا اتجهت للراجل ده ... يمكن حالة من الجنون مكنش ينفع يحتويها الا مجنون اخر

لاني من الناس اللي بعتبر تارنتينو بالفعل مريض نفسي بس مرض لذيذ .. هو دايما بينتقد علي انه دموي وافلامه عنيفة بشكل مبالغ فيه

رغم انه من القلائل اللي افلامه لفت مهرجات كترشيح او فوز من الاوسكار لكان لبرلين شرق وغرب !! حتي بعرض افلامه فقط فده دليل علي تميزه في اللي بيعمله

كان اول ما بيسالوه اتعلمت سينما فين او روحت المعهد ؟ يقولهم لا انا رحت الافلام (السينما يعني)

مخرج / كاتب /ممثل/مصور ميضرش /مونتير يمشي برضه/منتج

بس بيعتبر نفسه كاتب شاطر وده عنده اهم من اي شئ تاني

مولود في تانسيي (وده نفس البلد اللي اتقالت علي لسان براد بيت في فيلم (انجلوريس باسترد) ابوة امريكي ايطالي وامه ايرالندية (كوكتيل عجيب) وساب المدرسة وهو عنده 15 سنة وكان كاتب اول سيناريو ليه وهو عنده 14 سنة باسم (مغامرات مستر لي المذهلة) وبعد كده التحق بمدرسة للتمثيل وبعده كده اشتغل في محل تأجير شرايط الفيديو (ايام ازدهار الجهاز العجيب ده) وكان بيقضيها فرجة علي الافلام او مناقشات سينمائية مع الزباين وبعد كده محل لبيع القصص المصورة (الكوميكس)

تميزه في نظري في كتابة السيناريو (خصوصا في الكتابة الحوارية او الشرح... ببساطة نزل اي سيناريو من افلامه وااقراه..هتفهم قصدي)

في سنة 1987 اخرج فيلم قصير (عيد ميلاد اعز اصدقائي ) بس الفيلم ده المفروض اتدمر تماما في حريق وهو بيتمنتج ..( بس الفيلم موجود علي اليوتيوب وانا شفته ومش عارف هل هو مش كامل ولا هو اعاد تصويره بعد كده) بس عموما الفيلم ده كان البداية لاول فيلم باعه بعد كده

(رومانسية حقيقة 1993)

اللي اخرجه توني سكوت (اللي غير شوية في الفيلم وشوه شوية من السيناريو الاصلي لتارنتيو)...وهو باع السيناريو في الاساس عشان يعرف ينتج فيلمة الاول (كلاب المستودع 1992) وهو اتعرض بعده بالمناسبة

وسكوت كان قرأ (كلاب المستودع) وكان عاوز يخرج الاتنين بس تارنتينو رفض عشان كان عاوز هو يعمل الفيلم مش حد تاني .

هو خد عن سيناريو (رومانسية حقيقة) 50 الف دولار وده ااقل سعر لسيناريو مباع في الفترة دي ...حتي اي كاتب لاول فيلم كان بياخد اعلي من كده ...بس هو تقريبا مفرقتش كان محتاج فلوس

The work "fuck" and its derivatives are said 225 times.

تارنتينو مزارش لوكيشن التصوير ولا مرة رغم ان ده يعتبر اول فيلم ليه يتصور ويتباع .

من الحاجات اللي غيرها سكوت مشهد الرولر كوستر في الملاهي كان مكتوب انه في حديقة الحيوانات بس سكوت غيرها عشان يسخن الفيلم شوية او زي ما قال

دفعة من الادرينالين للمشاهدين ...

الفيلم بالمناسبة من بدايات براد بيت ودوره صغير بس مثلا فكرة انه اغلب الوقت قاعد علي الكنبة كانت فكرته مش من تارنتينو واتنفذت فعلا وكان فيه ظهور لجاك بلاك (بس مشهده اتحذف)

الفيلم علي- لسان تارنتينو- هو ااقرب فيلم اتكلم عنه ... هو بالمناسبة للي ميعرفش الفيلم بيحكي عن شاب شغال في محل كوميكس وهيحب فتاة ليل وهيحاول ياخدها ويهرب ...هو فيلم اكشن وعصابات وبعيد كل البعد عن الرومانسية والعواطف اللي نعرفها بس هو فعليا فيلم عن الحب ... بشكل عاجبني شخصيا لانها تناول جديد مش شوية عياط وبكي وجوابات وبنتجوز في الاخر والجمهور يروج مبسوط

في مشهد في اخر الفيلم اتغير كان المفروض البطلة هتقابل (مستر وايت) في الاباما اللي هو احد ابطال (كلاب المستودع) اللي فعلا بيتسال في الفيلم (ايه اخبار الاباما)

بس فسرها تارنتينو بعد كده بانه غير المشهد ده

(رومانسية حقيقة) و (بورن كيلرز 1994) كان فيلم واحد طويل كان كاتبه تارنتينو بالاشتراك مع روجر افري .

(بورن كيلرز) اخرجه اوليفر ستون اللي غير كتير في السيناريو وده برضه ضايق تارنتينو بس اللي هو كان ساعتها مجبر

كلاب المستودع 1992 :

اتكتب بالظبط في 3 اسابيع ونص ...

The film contains 272 uses of the word "fuck".

تارنتينو كان كاتب لنفسه دور (مستر بينك) واللي كان هيعمل دور (فيك فيجا/مستر بلوندي) جورج كلوني بس معجبوش الفيلم و صامويل جاكسون كذلك كان هيعمل (مستر اورانج)

(تيم روث/مستر اورانج) مرضيش يقرأ السيناريو من الاساس بس خرج مع تارنتينو وهارفي كيتل عشان يسهروا ويشربوا وهما سكرانين قرر يقرأ السيناريو وخد الدور

فيك فيجا/مستر بلوندي يبقي (وده كلام تارنتينو) اخو فينسنت فيجا (جون ترافولتا/بالب فكشن 1994) وكان ناوي يعمل فيلم يجمع الاتنين (في فيجا) بس اتوقف لان الممثلين سنا كبروا وهو طبعا كان عاوز يجيبهم في سن اصغر قبل الفيليمين دول لان الاتنين بيتقلتوا في الاحداث فلازم تكون فترة سابقة وده صعب .. رغم اني مستبعدش عن تارنتينو يصحيهم من الموت عادي يعني !!

الفيلم متصور اغلبه في مستودع/مخزن وفي مدة 35 يوم وده وفر كتير قوي واعتمد علي الحوار (اللي متميز فيه قوي تارنتينو) وفكرني ساعتها بفيلم تاني عظيم (مع اختلاف الفيلمين وقوتهم) ... فيلم (12 رجل غاضب 1957)

الفيلم مفيهوش ولا دور بناتي نهائي بس في 2002 بمناسبة الاحتفال بمرور 10 سنين علي الفيلم ظهر نسخة فيها دور لـ(نينا سيمازكو) بس انا شخصيا مش لاقي النسخة دي ومشفتش ايه الدور تحديدا .

وبالمناسبة (ودي معلومة مش مؤكده بنسبة 100% بس استغربتها) ان كل ابطال الفيلم في الحقيقة دخلوا السجن او قضوا كام ليلة في التحشبية ... مجرمين يعني بجد

الفيلم من اخطر 25 فيلم علي مستوي العالم رغم ان الفيلم مكنش فيه انتاج تقريبا ... 30 الف دولار والمنتج المشارك (لورانس بيندر) مثل في الفيلم (ايدي) بس الفيلم لما اتعرض علي هارفي كيتل وعاجبه ومثل فيه رفع ميزانيته لمليون ونص تقريبا .

ومع ذلك الفيلم متعملوش دعاية تقريبا

في افتتاججية الفيلم في مناقشة طويلة قوي من تارنتينو عن اغنية مادونا 'Like a Virgin'.اللي قعد شرح ويترجمها انها قصدها مش تمام ... لما مادونا شافت الفيلم فعلا بعتتله نسخة من الشريط وكتبتله لا هي علي فكرة بتتكلم عن الحب ولما قبلته قالتله هي متضايقتش بالعكس عاجبها الفيلم جدا

وبمناسبة مادونا لما اتجوزت هي المخرج جاي ريتشي كان قال عشان نبقي متساوين المفروض اتجوز (الفيس بريسلي) !!!

بعد الفيلم ده اتعرض عليه يخرج افلام(رجال متشحين بالسواد) بطولة ويل سميث وفيلم(سرعة) بتاع ساندرا بولوك ورفض عشان يتفرغ لافلامه هو .. بس اعتقد لو هو كان فعلا اخرجهم كان هيبقي ليهم شكل مختلف تماما عن اللي اتعرض... وبالمناسبة هو كتب من الباطن وعدل سيناريوهات (منتصف الليل الماضي 1991 – كريمسون تايد 1995 – الصخرة 1996 – كوردلد 1996)

الفيلم زي ما قالت اتكلف بالظبط مليون و200 الف وجاب 2 مليون ونص في امريكا يعني غطي تكاليفه مرتين غير باقي العروض الخفيفة في باقي الدول .

بعتبره من افلامي المفضلة وكان للصدفة البحتة اول فيلم اشوفه لتارنتينو رغم اني معرفوش من اول ما ظهر اكيد ... تقيمي الشخصي 9/10 (حتي لو بان تقيم مبالغ فده لاني بحب الفيلم بعيدا عن اي شئ تاني)

------------

الاسبوع الجاي الجزء التاني :)

الترجمة لاسامي الافلام :

عيد ميلاد اعز اصدقائي = My Best Friend 's Birthday 1987

رومانسية حقيقة = True Romance 1993

كلاب المستودع = Reservoir Dogs 1992

بورن كيلرز = Natural born Killers 1994

منتصف الليل الماضي = Past Midnight 1991

كريمسون تايد = Crimson Tide 1995

كوردلد= Curdled 1996

الصخرة = The Rock 1996

في فيجا= Double V.Vega

اثني عشررجل غاضب = 12 angry men 1957

رجال متشحين بالسواد = Men In Black

سرعة = Speed

انجلرويس باسترد=Inglourious Basterds 2009

Red

2010-11-23T12:34:00.000-08:00

الريفيو ده هو رقم 100 مع مجلة مصري .. صحيح مش كله منشور هنا بس هو موجود في الداتا ... فرحان بالوقت اللي عادي اللي مش عارف عدده وتجربة فخور بيها... كنت اول مرة اكتب ولسه بتعلم فيها احسن الاسلوب ... شكرا للي مستحمل اسلوبي رغم اني تقريبا الوحيد اللي بكتب ريفيوهات بالشكل ده في مصر ويمكن دي ميزة :) او عيب ... محدش يعرف لسه !!

Red

ينفع للى .... لأى سن

Release date: September 2010 (USA) November 2010 (Egypt)

فيلم لبروس ويلز ومورجان فريمان و مالكوفيتش !!! ... ازاي مايتشافش، وخصوصا انه اكشن كوميدي .. يعني مافيش بعد كده.

و الاسم بنعرف انه اختصار لكلمة Red = Retired Extremely Dangerous، بالعربي (ع المعاش و خطير للغاية).

القصة : عملاء من السي اي ايه كلهم علي المعاش، بيكتشفوا فجاة ان فيه ظابط بيطاردهم عشان يقتلهم بلا مبرر، و بيجمّعوا في بعض علشان يعرفوا السبب و يدافعوا عن نفسيهم ... بس كده ..

الفيلم اصلا متاخد عن قصص مصورة بنفس الاسم لـ Warren Ellis & Cully Hamner

السيناريو Jon Hoeber & Erich Hoeber:

السيناريو لذيذ و القصة مش بايخة بس اشد مافي الموضوع فعليا الحوار ... كان صايع بشكل مش طبيعي وكوميدي بدون استظراف او ايفيهات، على العكس تماما، وفي نفس الوقت ماكنش باين انهم بيهرجوا.

افضل شخصية فعلا هي شخصية (جون ملكوفيتش/مارفن) خطيرة للغاية سواء كتابة او اداء، فهى مكتوبة باسلوب غريب، ويمكن من احلي الشخصيات اللي حبيتها على الشاشة ... ولو اتعمل لها فيلم لوحده مش هتضايق نهائي بالعكس.

الاخراج Robert Schwentke:

الفيلم لذيذ اخراجيا، و فيه كام لقطة عجبوني قوي، زي اللقطة اللي في التريلر، لما بروس ويلز بينزل من العربية وهي بتتحرك ... عجبتني جدا بشكل مبالغ فيه يعني. و اختيار الممثلين كان عبقري، وعاجبني ان كلهم مثلوا كانه فيلم للاوسكار .

التمثيل وده طقم طويل عريض :

Karl Urban: الظابط اللي بيطاردهم ... تمثيل كويس ولايق عليه حبة الاكشن اللي عملهم، بس لما عمل رد فعل حزين ماحسيتش باي شئ خالص.

Morgan Freeman: دور صغير وكنت متوقع اكتر من كده، بس كالعادة يعني بيعقدني من ادائه السلس و البسيط واللي مظبوط علي اي دور (دراما/اكشن/كوميدي/خيال علمي...) ممثل عجيب فعلا.

Mary-Louise Parker: سارة، حبيبة بروس ويلز، و هى مش من العملاء بس اتدبست معاهم ... دور في اوله كان لذيذ قوي، بس في اخره حسيت انهم كروتوها قوي، وكان ممكن يتعمل معاهم مشهدين تلاتة حلوين.

Bruce Willis: هو صحيح السن باين قوي عليه، و مابقاش ينفع يعمل ادوار الاكشن دي، بس في الفيلم ده عاجبني عكس فيلم Live Free or Die Hard ... وهو فيه خناقة وحيدة ليه و الباقي كان عادي عشان كده مزهقتش منه.
Helen Mirren: الاوسكارية ... اداء مسخرة بمعني الكلمة، رغم ان اللي كان مترشح للدور ميريل ستريب وما ادراك من هي ميريل ... بس مانكرش ان هيلين قامت بالواجب وعملت دورها 10/10

John Malkovich: انا مش متصور الشخصية دي اتعملت ازاي ؟؟؟ هو شخصية عميل للسي اي ايه، بس مجنون ... ولولا اني عارف مالكوفيتش كويس كنت افتكرت انه فعلا اتجنن !!! دور مسخرة وحقيقي قوي بشكل هيخليني اشوف الفيلم تاني عشان اتفرج عليه ... كان المفروض مرشح للدور John C. Reilly، بس معتقدتش اي حد يقدر يعمل الدور بالشكل العبقري ده.

لفيلم لسه ماتعرفش تقيمه، أنا لسه مش محدد قوى ... بس انا بديله 6/10، وهو رقم كبير اينعم علي فيلم كده، بس انا عاجبني قوي التمثيل و الاخراج ...

صناع الفيلم عملولي دماغ ... و اصلا مالكوفيتش لوحده له 3 او 4 درجات علي الدور المجنون ده.

زهايمر 2010

2010-11-16T13:15:00.000-08:00

about schmidt 2002


زهايمر 2010

زهايمر

أنتاج نوفمبر 2010

ينفع للى أكبر من 16 سنة

هنحرق القصة مش الأحداث (مضطرين للأسف)

فيلم عادل امام، والحقيقة ماكنتش متشجع نهائي ... وخصوصا ان اعلانه نفسه مش مشجع، بس اللي شجعني عليه وجود فتحي عبد الوهاب لاني بحب تمثيله شخصيا.

البوستر : فيه بوسترين منهم واحد منقول نصا وصورة وكل شئ من بوستر فيلم لجاك نيكلسون زي ما مكتوب اهو !!!

استسهال مع ان فيه 100 بني ادم لو فكروا ثواني هيجيبوا افكار محصلتش !!

القصة : محمود شعيب (عادل امام) بيصحي من النوم بيكتشف انه عنده زهايمر، وهو متأكد انه معندوش، وكل الناس اللي بيخدموه هو ميعرفهومش.

الاحداث بتتكرر يوميا، وكل اللي يعرفهم بياكدوله انه مصاب بالزهايمر من سنتين ومش فاكر اي شئ .. مش فاكر غير اصحابه (احمد راتب و سعيد صالح) و اولاده (فتحي عبد الوهاب و احمد رزق) ... فبيروح لصاحبه احمد راتب اللى بياكد له انه فعلا مصاب بالزهايمر، ولما بيروح لسعيد صالح بيلاقيه هو نفسه مصاب بالزهايمر (بدون حرق ... ده افضل مشهد في الفيلم كله).

وده نصف الفيلم الدرامي اللى بيتخلله بعض الكوميديا، بتحايل عادل امام علي الدكتور او الممرضة عشان يخرج ويسيب البيت.

النص التاني : عادل امام الاب بيكتشف ان ولاده رافعين فضية حجر عليه عشان مديونين للبنك وعاوزين يسددوا وهو رافض يسلفهم، فبيتفقوا مع كل البشر، حتي صاحبه اللي بقي شريكهم، انهم يخدعوه لحد ما يصدق انه مصاب بالزهايمر وبيدوله دوا بيخليه عنده نفس الاعراض تقريبا، فبيقرر يربي ولاده من اول جديد ... وهنا شوية كوميديا بقي ...

طبعا مش هاقول النهاية لانها فيلم عربي زيادة عن اللزوم والجمهور عاوز كده

نادر صلاح الدين (السيناريو):

القصة نفسها حلوة بس تقريبا نفس التعليق اللي قلته علي فيلم العالمي، فقد ركزت علي قصة "تاكل مع الناس"، وسيبت قصة اهم.

يعني اعتقد التركيز علي قصة سعيد صالح لوحدها تعمل فيلم درامي محترم قوي ... صحيح نكد بس مين قال اني محتاج اشوف عادل امام طول الوقت فى كوميدي، خصوصا ان كل الناس دلوقتي عاجبها قوي كوميديا حلمي ومكي والثلاثي (شكيو وهشام وفهمي) اللي هي لايقة قوي علينا.

لكن هضحك علي افيهات عادل امام و حركات وشه والكلام ده صعب ... بس مانكرش ان فيه شوية حاجات لذيذة في القصة، بس اعتقد انه كان ممكن يبقي عمل اهم بكتير من مجرد فيلم للعيد.

الشخصيات مافيهاش اي عمق او اهتمام سوي بالشخصية الرئيسية، و دور زي دور نيللي كريم كان ممكن يبقي اقوي من كده، وكذلك شخصية فتحي عبد الوهاب اللي ما انقذهاش غير اداؤه.

عمرو عرفة (الأخراج) :

انا شخصيا عاجبني قوي الفيلم اخراجيا، وعاجبني اكتر الاهداء اللي اتكتب في الاول لصلاح مرعي (مهندس الديكور) ... اللي الصراحة يستاهل عن الفيلم ده 100 اهداء مش واحد بس، هو و صورة محسن احمد عملوا رؤية حلوة قوي خصوصا في لبنان ... بس كان فيه كادرات كتيره متحركة يمين وشمال، حسيتها استعراض زيادة عن اللزوم ...او ملأ فراغات.

التمثيل :

طقم الممثيلن المساعدين الحقيقة كانوا جامدين قوي (ضياء المرغني- يوسف عيد – ايمان السيد) و الاخيرة دي عاملة دور كبير مش مجرد ظهور ... و هى الحقيقة قمة في الكوميديا.

احمد راتب : العادي ... قوي

لطفي لبيب : شرحه ...عادي بزيادة

نيللي كريم : دور صغير وعادي ... اعتقد عشان بس مع عادل امام

رانيا يوسف : مافهمتش ايه علاقة ده بالتمثيل !!!!

احمد رزق : دور عادي ... اللهم مشهدين قصاد عادل امام، هو بيختلق الكوميديا وانت بتكمل.

عادل امام : لحد نص الفيلم كنت مستمتع، وحسيت ان هو ده عادل امام اللي عاوز اشوفه ... بيعمل افلام ماشية مع سنه وموضوعات قوية. بس النص التاني قفلني قوي.

فتحي عبد الوهاب : اداء لذيذ بعيدا عن ضعف الشخصية في السيناريو، وماتخيلتش يبقي فيه كوميديا ... بس الحقيقة حلو قوي .. الا بس مشهد الضحك اللي في البانيو كان باين قوي انك بتضحك بجد.

سعيد صالح : مشهد بالفيلم كله ... فينك بقي ياعم ؟؟ الممثل الكويس لو مشهد واحد بيبان، وانت بمشهد عملت فيلم بحاله ... رائع واكثر من رائع.

الفيلم مقبول ... يعني 5/10

مايضرش تشوفه، بس مرة مش اكتر ... هتستمتع لانه افضل كتير قوي من افلام عادل امام الاخيرة، خصوصا الفيلم الاسطوري ب وبوس.

Eat Pray Love

2010-11-09T14:50:00.000-08:00

Eat Pray Love

ينفع للى أكبر من 16 سنة

الريفيو يحرق بعض الأحداث ... بس مش قوى

Release date: August 2010 (USA), Egypt (September 2010)

فيلم جوليا روبرتس ... ممثلات قليلين قوي اللي اتفرج علي افلامهم وانا منوم مغناطسيا ...

اولهم جوليا روبرتس ... لا ومعاها كمان خافير بارديم.

القصة : كاتبة اسمها (ليز) بنشوفها في زيارة لـ(بالي)، وقاعدة مع طبيب قروي من اللي بيقروا الكف دول ... وبيقولها انها هتيجي تزوره بعد سنة تقريبا بعد ماتخسر كل فلوسها وحياتها تبوظ، بس هتيجي عشان تعلمه انجليزي وهو هيعملها كل شئ في الحياة يعرفه !!

بترجع وبعد وقت بتطلب الطلاق من جوزها، اللي، زي اي زوجين عادين، فيه بينهم اختلافات ومشاكل وعادي ... بس بتصمم وجوزها بيعيط وبيقولها بحبك وهي ولا الهوا، و بتقوله لا انت مش مهتم.

بتصاحب بعد كده واحد ممثل، و هو اصغر منها و بيحبها برضه. بس هما عارفين إن دي علاقة فاشلة، بس هو لما بتبعد بيكتشف انه مايقدرش يسيبها و عاوزاها. وبيعيشوا شوية مع بعض، وبياخدها تعيش معاه و مع الطقوس الدينية الهندية اللي بيمارسها وحاجات من دي بقي ... بس هي في دماغها بتقرر تاخد سنة اجازة تلف فيها العالم، وتحاول تاخد وقت لنفسها ... وبرضه الواد بيتحايل عليها وهي ولا الهوا (غريبة يا ليز انت).

اول مكان بتروحه ايطاليا : بتتعلم ازاي تستمع بالحياة والاكل، وازاي تستمع بكل حاجة او بمبدأ الـ(ولا اي حاجة) يعني انك ماتعملش اي حاجة ... وده مبدأ ايطالي اشبة بالمصريين اللي ماشيين بمبدأ فوت علينا بكرة، وده بيتثبت ان الطلاينة فعلا مصريين اوروبا.

بتتعرف علي مجموعة ناس، بنت سويدية ومعاها حبيبها الايطالي اللي بيعلمها اللغة ... وهيعلم ليز كمان وهيعرفها علي عيلتها ويبقوا صحاب وبح ... بتسافر ليز للمحطة اللي بعديها.

تاني مكان الهند، و بتروح للمكان اللي قالها عليه حبيبها التاني عشان تتعلم الطقوس الدينية وتختلي بنفسها شوية، بس بتكتشف انها ماتقدرش نهائياً و بتبدي تمارس انشطة تانية هناك. وبتتعرف علي واحد برضه زيها كان جاي يتخلص من ماضى مؤلم في حياته.

وهوب راحت على بالي، ورجعت للطبيب القروي ده وعرفها ... وسابها تنطلق. واتعرفت هناك علي (خافير بارديم/فيليب) المطلق زيها، وشوية بيتخانقوا وبعد كده يتصالحوا ... وفي نفس الوقت بتتعرف علي ست قروية وبتصاحبها هي وبنتها.

هي دي تقريبا معظم القصة بدون تفاصيل دقيقة او كشف للنهاية ..

القصة متاخدة من كتاب بنفس الاسم لـ Elizabeth Gilbert، هو تجربة شخصية زي ماقريت. و لكن الكتاب بالنسبة ليا كتاب "تنمية بشرية"، وده مجال انا بكرهه تماما ... لاني على الرغم من حبي لادب الرحلات والسير الذاتية بس في فرق بينهم وبين الكتاب ده.

Ryan Murphy & Jennifer Salt: السيناريو و الحوار

انا مع ان كتاب يكون حلو يتعمل فيلم، وفيه امثلة كتير قوي لافلام مهمة جدا ... هي اصلا روايات او حتي قصص قصيرة ... بس الصراحة انا مش شايف ان الكتاب وووووواو قوي كده انه يتعمل فيلم ... الجمل الكتير (الحلوة بالمناسبة) اللي اتقالت حسستني اني فى محاضرة طويلة قوي مدتها ساعتين عن التنمية البشرية، و عن ازاي اعرف اعمل توازن في حياتي ...

انا لو على كده كنت قريت الكتاب وانجزت يعني بدل كل الكلام ده.

حاجة كمان الشخصيات ... يعني الفيلم يبقي مبني علي بطل او اتنين وشخصيات مساعدة، بس في الحالة دي كان يبقي بطل وشخصيات في كل مكان بس لا تفوق البطل اهمية ... بس انا في كل بلد ركزت في شخصيات تانية غير البطل، ومش عشان هما اكثر اتزانا بالعكس هما يمكن مشاكلهم تفوقها بمراحل ..

يعني ازاي اقتنع ان ست جوزها بيحبها قوي وبرضه مصممة علي الطلاق، يعني هي اللي مش عاوزاه ... يعني ست هي مش عارفة اصلا هي عاوزة ايه والموضوع مش متوازن.

اعتقد الست دي لو في الفيلم او الحقيقة عندها اطفال كانت برضه هتتطلق او تسافر ... حسيت إن فيه نوع من الانانية الغير مبررة، لان الواحد مش محتاج يسافر اخر بلاد الدنيا عشان يعيد توازنه، ممكن وهو في مكانه يعمل ده.

كمان فيه شخصيات زي ابن فيليب، كان ظهوره مالوش اي داعي غير فى مشهد بس بكاء فيليب ... اللي اصلا كان ممكن يتعمل بدون ظهور الابن وبدون دموع وكان هيبقي اقوي كتير.

: الإخراج

اخراجيا الفيلم كصورة عاجبني الصراحة قوي، واماكن التصوير لذيذة ومريحة للعين وتحسها ماشية قوي مع جو الفيلم. و
الفيلم ده هينقل مخرجه من العمل التلفزيوني للسينما بشكل اكبر ... كفاية انه كان معاه جوليا وخافير وطاقم تمثيل حلو قوي الصراحة وده اللي جايله بقي فى الكلام دلوقتى ..

التمثيل :

Javier Bardem : هو حبيبي قوي ومن اقوي الممثلين علي الساحة، ومنتظر كمان فيلمه الجديد ... بس الحقيقة مش بالع خالص الدور اللي عمله ده ... تمثيل عادي قوي وحسيته عمله مجاملة وبرضه اسمه اشتغل مع جوليا.

: ديفيد الشاب اللي علمها ... تمثيله رائع وخصوصا وهو بيعلمها اللغة.

Richard Jenkins: ريتشارد رفيقها في الهند، الراجل طول الوقت لذيذ لحد مابيعمل مشهد قصادها ... رائع بجد بس اوحش حاجة فيه كتابته في السيناريو ... هو بيحكي عن ابنه بس بشكل تحسه عاوز يعرض الحكاية وخلاص علي الشاشة بس الراجل اداءه غطي علي النقطة دي.

Hadi Subiyanto: الطبيب اللى من بالي، وهو اول مرة يمثل ... ورغم كده دوره حلو قوي و تحسه انه خارج من قصص باولو كويلهو ... نفس الهدوء والكلام المظبوط.

Julia Roberts : لو بعدنا عن اخر كام فيلم ليها، فهي ابتدت ترجع شوية لزمان ... و تعمل ادوارها بعبقرية. ولسه كالعادة استحمل اشوف فيلم وحش بس عشان تمثيلها. يكفي ان كل ماتيجي تيعط احس اني هاعيط معاها ... وفي الفيلم مثلت بجد على الرغم من ضعف الفيلم.

الفيلم تقيمة 5/10 وانا بديله 4/10 و شايف ان حسن النية ماتعملش فيلم كويس ..

بس اعتقد إن البنات هتحب الفيلم ده قوي، لان حتي اللي مش بيفكروا كاغلب البنات انهم حالات خاصة، هتلاقيهم بعد الفيلم بيفكروا كده ... و يفكروا ان كل واحد كائن فضائي لازم تتعامل معاه بشكل مختلف ..

هو ده حقيقي بس ده علي كل البشر وكل مخلوقات ربنا مش بس البنات يعني !!

Jonah Hex 2010

2010-11-02T16:44:00.000-07:00

Jonah Hex

نفع للى أكبر من 16 سنة (مناظر عنف و إشى خيال يا ناس)

الريفيو على فكره بيحرق أحداث الفيلم

Release date: June 2010 (USA)

انا من التريلر مستني الفيلم ده، والسبب بسيط ... و هو صانعي الفيلم، او تحديدا كاتبي السيناريو و الحوار، ولهذا اسباب عدة.
وكمان الفيلم من الأفلام المبنية على قصص الكوميكس وانا بحب النوعية دي، وماكنتش شفت قصصها قبل كده.

القصة : القصة بتبدأ بترمبل (جون مالكوفيتش) وهو بيعذب البطل جون هيكس وبيقتل عيلته، و بيقوله انه بينتقم منه عشان قتل ابنه ... و بيختم علي وشة بالنار (حاجة زي ضربة المطوة عندنا بس دول امريكان بقي وايام الكاوبوي ... فرق ثقافات) ..
المهم فجاة بنلاقي كلام بيتناقل ان جون هيكس انتقم و قتل ترمبل ده وعلم عليه ... شوية و بيبقي جون هيكس خارج عن القانون ومطلوب القبض عليه، وبعدين بنكتشف سرقة اسلحة من الجيش الامريكي، و ترمبل عايش و بيجهز سلاح سري ... و طبعا استدعوا عدوه اللدود المطلوب اساسا جون هيكس، وجابوه وهو عند صاحبته ليلي (ميجان فوكس) ..

مش فاهم ماتقبضش ليه عليه من الاول، يعني مدام اصلا مطلوب من القانون !!
المهم الاخ جون هيكس ده بيتقال انه مات و صحي، فبيتكلم مع الموتي عادي و بيعذبهم قبل ما يوديهم الجحيم !!
المهم البوليس بيتفق معاه يوقف ترمبل، و عادى بيكلم جثة وبيعرف منها مكانه و بيروح يدور عليه ... شوية احداث غريبة و كلها في الضرب والقتل و كلام مع ميتين ... وبعدين بنكتشف ان ترمبل بيصنع سلاح شرير عشان يدمر امريكا.
بيقف له طبعا هيكس، و لكنهم بيهددوه في الاخر بقتل ليلي صاحبته، فبيضعف و يتحبسوا ويهرب وينقذ امريكا علي آخر لحظة ... مشهد النهاية داخلي فى مكتب الظابط اللي بيكره هيكس، بيقوله هتبقي الشريف (المأمور يعني) فيعتذر و يخرج !!!

طبعا انا ضد نظرية المؤامرة ... بس المرة دي مستحيل يكون ده فيلم مش دعائي، و البطل الامريكي باين انه حتي لو غلطان جواه الخير ماليه !!! ... و لكن كل ده عادي، اللي مجنني بس سر العداء بين هيكس و ترمبل، وقلت يمكن ماخدتش بالي من السبب بس هو فعلا ماتقالش !!!!

القصة : متاخدة من كوميكس لشركة دي سي، وكاتبيها تلاتة ... واحد كتب القصة معاهم و هو لايذكر وحاسس انه مجاملة، بس الاساسين فى السيناريو و لحوار هما : Mark Neveldine & Brian Taylor

هما السبب اني استني الفيلم لاستمتاع باللي بيعملوه، رغم انهم كاتبين بس 5 افلام واخرجوا منهم 3 بس افلامهم بلا قيمة فعلية او مهرجانات و كده ... بس بتحس باستمتاع شديد مع الفكرة و مع الفرجة.
و افلامهم السابقه، علشان توضح الفكرة: Crank 1 & Crank 2 & Pathology & Gamer
الاتنين الاولانين معروفين ... و على الرغم من وجود الكثير من المشاهد الجنسية فيهم، بس الفكرة بربع جنية و فى نفس الوقت ممتعة للغاية، و هى عن شخص هيموت بحقنة سم وقدامه كام ساعة ولازم يعمل مجهود عشان بس يفضل يعيش ... فبيجري طول الوقت او بيكهرب قلبه عشان يعيش في الجزء التاني.
و الفيلم التالت عبقري و بحبه شخصيار ... بيتكلم عن اطباء الترشيح اللي بيتراهنوا كل فترة حد فيهم يقتل انسان والباقيين يكتشفوا طريقة الموت !!
و الفيلم الرابع هو تحويل لفكرة لعبة جي تي ايه لفيلم، بس بشكل بعيد عن اللعبة ... و لكن بأن فيه ناس بتلعب لعبة كده بس بناس بجد، و متحكمة في كل شئ حتي فى مشاعرهم ... بس بعد فترة بيكتشفوا ان مشاعرهم موجودة.

افكار حلوة وبربع جنية بس لحد الفيلم الاخير ده و مامشيتش معاهم ..

عني الحوار صايع و برضه الاحداث و حتي فى رسم الاسلحة و اسلوب استخدامها ... بقى ده اسلوبهم ؟؟ اشك انه اخراج نهائيا ... بس القصة فعليا لا تستحق اصلا العرض، وفيه قصص كوميكس افضل كتير من قصة زي دي، اللى مليانة مجاملات فجة لامريكا ... زي جملة ان امريكا بعد 200 سنة هتبقي هي الاولي !!!

الاخراج : Jimmy Hayward
محرك افلام انيمشين و عمل افلام كتير حلوة مع بيكسار، واخرج فيلم رائع انيميشن برضه إسمه Horton Hears a Who، بس مش معني كده انه يخرج افلام بجد ... ده مجال وده مجال ... لان الفيلم سئ رغم صورته الحلوة، اينعم عشان متكلف كويس ... بس غير كده وحش وكاست تمثيل اوحش، باستثناء (جون ملكوفيتش)
الفيلم كان ممكن يبقي برتم احلي من كده ... لكن هو حسسني بجد اني بتفرج علي فيلم Ghost Rider، و الاتنين كوميكس و الاتنين شغل موتي و يتميزا بالصورة !!! اعتقد اخراج مش لذيذ علي سيناريو و قصة ضايعة اساسا.

التمثيل :

كان فيه ناس من اصحاب المخرج اخرهم ادوار تلفزيونية وصوتيه فقط، وده برضه بيدل علي سوء اختيار الممثلين.

Megan Fox ممثلة شكل بس، وهي سيئة للغاية ... والاشد دهشة ان اختياراتها بدل ماتعلي بتقل !!! اعتقد مش هتطول وهتتنسي بسرعة.

Josh Brolin جون هيكس البطل ... ماعجبنيش نهائيا و ماينفعش يبقي هو ده شكل البطل ... مش قصدي ملامح اقصد اداءا ...

John Malkovich ممثل تقيل قوي و دوره بالمللي، مع انه فيلم تفريحي فهو مش مخرّج كل طاقاته، بس هو حتي لما عمل افلام زي (احرق بعد القراءة Burn after reading) اللي هو كوميدي و خفيف، اتعامل مع الفيلم بشكل اقوي كتير من الفيلم ده.

الفيلم اخرة معايا 3/10، بسبب مالكوفيتش ونافلدين و تايلور والبوسترات اللى شكلها حلو ..
بس هو فيلم سئ بجد !

بانوراما الفيلم الأوروبي 3 Panorama of the European Film

2010-10-30T12:49:00.000-07:00

بانوراما الفيلم الأوروبي في دورتها الثالثة بالقاهرة

نخبة من الأفلام الحديثة الحاصلة على جوائز عالمية لكبار صناع السينما من ممثلين و مخرجين .

في الفترة من 3 ل 9 نوفمبر
سينما سيتي ستارز و جالكسي- القاهرة

لينك الايفيت علي الفيس بوك (بانوراما الفيلم الاوربي 3)

لينك تحميل جدول العروض في ستي ستارز وجالاكسي (انقر هنا)

ده جدول عروض سيتي ستارز

ده جدول عروض جالاكسي

فيلم انتريور وده اكتر فيلم مستنيه وهو مخرج افلام بابل و21 جرام


فيلم فرنسي عن مجموعة من الرهبان في الجزائر - فيلم مهم وحقيقي وسمع جامد قوي في المهرجانات

ودول اكتر فيلمين هاشوفهم الباقي لسه مش محدد بس في افلام زي فيلم الشريط الابيض الالماني ده انا شفته من سنة لانه كان مترشح اوسكار وهو فيلم مهم قوي قوي ومخرجه هينكيه من اهم المخرجين الالمان وامتعهم رغم ايقاعه الهادي اللي ممكن ميعجبكش كتير من الناس

The American

2010-10-26T12:58:00.000-07:00

The American

ينفع للى أكبر من 18 سنة (مشاهد سيكو سيكو بقى و بتاع)

Release date: September 2010 (USA & Kazakhstan !!!)

فيلم كلوني الجديد وده سبب يكفيني انا شخصيا اني اشوف الفيلم و خصوصا انه بعد فيلمه الرائع Up in the air

والحقيقة ماكنتش متفائل بالفيلم ده قوى من الاعلان بتاعه، وخصوصا ان الفيلم مصنف: اكشن – اثارة – دراما – جريمة ... فالواحد مابقاش عارف هو ايه نظامه. وكمان البوستر الاصفر القديم ده علي قد ماشدني قوي قوي، بس خفت ليكون فيلم تسعيناتي زي افلام سلفستر و رودريجز اللي رجعتنا لافلام الفيديو تاني زى The Expendables & Machete.

القصة : البداية كلونى خارج من بيت جليدي مع مزة فى مشهد حب بينهم، و فجأه بيتعرضوا للإغتيال، و هو بيهرب و لكنه و بمنتهى البساطة بيقتل البنت اللي معاه !!!. و بعدين بيقابل واحد (انت مش فاهم هو جورج كلوني شغلته ايه لحد دلوقتي) و بيقوله علي بلد في ايطاليا يلجأ لها لحد مايكلمه ... وياريت مايتعرفش أو يصاحب حد هناك للسرية.

و فعلا بيروح و بيفضل يلف و يدور، و بيروح بس لبيت للعاهرات ... و بيتعرف علي بنت هناك عشان يقضي وقته، وفي نفس الوقت بتيجي بنت مرسال من رئيسه في الشغل، و بنكتشف ساعتها ان كلوني صانع اسلحة مش اكتر.

مع الوقت بيتعرف علي البلد و على كاهن المدينة اللى بيتعرف عليه وبيصاحبه، بس مش صداقة هي تحسها جلسة اعتراف غامضة من الطرفين ... وفي النص بيظهر شخص غامض يبعتله جزء من جرنال بيتكلم عن حادثة القناص، و عن البنت اللي اتقتلت في اول الفيلم وبس ... (الجزء ده عبقري و مش هاحرقه).

بعدها شفنا كلوني ضايع بين عدم الاستقرار و الوحدة ... و زي ما اتقال في الفيلم هو رجل الفراشات (فى طور الانقراض).

السيناريو و الحوار: الفيلم مقتبس من رواية لـ Martin Booth، ومش هاقدر احكم علي الرواية نفسها بس الموضوع مكتوب بشكل نفسي رائع مش مجرد اكشن او اي شئ من ده.

Rowan Joffe كاتب السيناريو ... وهنا نبص لكذا نقطة. اولهم الرواية والموضوع اللي كان ممكن يبقي اكشن، بس اتعمل بنضافة. تانيهم البداية الخيالية اللي تقريبا من افضل البدايات اللي ممكن اكون شفتها ... يعني لما قرأت عن فن السيناريو، من الحاجات اللي اتعلمتها إن السيناريو الجيد تلاقى ان اول دقيقتين فيه (اول مشهدين يعنى) يشدوا المشاهد ...

و انا ماعتقدتش إن في شد للمشاهد اكتر من ان رجل و امرأه (هتفتكرها حبيبته) وفجاة يقتلها بعد ما دافع عنها !!!

مشهد النهاية اللي المفروض متوقع قوي قوي .... بس ييجي ازاي ده ؟ كل ما اقول خلاص خلص الفيلم، الاقي نقلة تانية وتالتة بشكل خلاني أفضل مستني بعد التتيرات ليكون هيجيب مشهد تاني ولا حاجة.

الاخراج : Anton Corbijn ... تاني فيلم ليه، بس كان ليه في التسجيلي و الفيديوهات. بس الحقيقة حسيت انه بقاله 100 سنة بيخرج، وعارف كويس الورق اللي تحت ايده ايه، و ازاي يعمل فيلم كويس قوي ..

الفيلم حلو قوي وطقم تمثيل عالي ... به مناظر حلوة قوي، بس حسيت انه كان ممكن يلعب فيها اشد من كده وكان ممكن يخلي الفيلم بقوة فيلم Up in the air ... بس هو مع ذلك فيلم عظيم جدا.

لكن من اللقطات اللي ماعجبتنيش، مشهد النهاية المواجهة بين كلوني و رئيسه ... كانت عبيطة حبتين، و ماعدلهاش الا اداء كلوني كالعادة .

Herbert Grönemeyer الراجل بتاع المزيكا ... هو الماني و شغله قليل، بس عامل مزيكا عبقرية بمعني الكلمة والاغاني، حتي اللي اتحطت في خلفية الأحداث، مختارنيها بشكل جامد قوي.

يعني كلوني لما كانت البنت بتقول له انه رجل الفراشات، فكان بيجي في الخلفية اغنية مادونا Madama Butterfly، كمان اغنية Tu Vuò Fà L'americano ... ودي في خلفية مشهد كان هيتكشف فيه !!!

المشهد الأخير ده كان عبقري بشكل مش معقول، مع ان الاغنية فرايحي قوي والجو متوتر قوي ومشحون بس تقريبا مفيش اختيار اصيع من ده .

التمثيل : طقم اغلبه ايطالي تقريبا

Paolo Bonacelli الكاهن : شخصية غامضة ماتفرقش عن البطل كتير، ساعات كنت بحس ان ده ممكن يمشي شرير الفيلم بس مش شر مؤذي، بس هو نقيض البطل ظاهريا وداخليا مايفرقش عنه كتير ... اداء رائع جدا.

القناصة اللي بتطلب منه السلاح ... شخصية مشابهه ليه قوي، بس انا كنت عاوز مشهدين ولا حاجه تانى ليها ... هى شخصية تشد قوي و اداء معقول من الممثلة.

Violante Placido كارلا، البنت اللي هيتعرف عليها وهيحبها اكيد ... و رغم انها نص الفيلم قالعة، ومش بتعمل مشاهد بمعني الكلمة ... بس دورها كان اعمق و ظهرت قوته في ردود افعال كلوني ..

هي مزة الصراحة ببس مش حاسسها ممثلة فظيعة.

George Clooney عم الشباب ... كانت فاكر الفيلم ده هيكون شباك تذاكر زي العادة، فيلم قوي قوي .. و ممكن ييجى بعده فيلم ولا اتنين للتذاكر، بس الصراحة انبسطت جدا بالفيلم.

الراجل ده خسارة انه مايخدش اوسكار تاني، بس اعتقد إن الترشيح لازم يبقى علي الدور ده، فهو ممثل قادر علي توصيل احاسيس كتيرة و غريبة ببساطة متناهية.

الفيلم واخد 6.8/10 وانا بديله 7.5/10 بس اللي هيشوفه ممكن في السينما عندنا مايضرش، بس يشوف النسخة الديفيدي لان هيفوته مشاهد كتير هتتشال ... هي صحيح هتبان انها جنسية بس هي مهمة قوي، فرؤيتك لبطل الفيلم واحساس الخوف والرهبة اللي ملازمة اغلب الوقت حتي في الاوقات الحميمة بيساعدك على الإندماج اكثر فى الفيلم و تصديق الشخصيه و التعرف عليها.

- Letters to Juliet 2010

2010-10-19T15:26:00.000-07:00

- Letters to Juliet 2010

+ اي سن بس اعتقد للبنات اكتر

مش عارف رغم اني بقالي فترة بحاول ابعد عن افلام الرومانسيات و الزعطنيات (ده مصطلح زي البكاء علي الاطلال كده) بس الفيلم نزلته و فضل عندي شهرين لحد ما قلت اشوفه واخلص من باب العلم بالشي

- القصة : بنت كاتبة وحبيبة (طباخ) بيسافروا اجازة ايطاليا وهو بيحاول يشوف اماكن يشتري و يتعلم فيها عشان بيفتح مطعم في امريكا وهي بتحاول تقضي وقتها لانه اغلب الوقت بيسبها وهي في طريقها بتوصل لبيت جوليت اللي الناس بتروحله لحد النهارجة(البنات بس) وبتكتب جوابات و بتعلقها علي حائط البيت وفي مجموعة من الستات مسمين نفسهم (مبعوثات جوليت) بيردوا علي الجوابات دي ويبعتهوا علي العنوانين بتاعت اصحابها ... فالبنت بتعجبها الفكرة وفي انشغال حبيبها بيقلوها تكتب معاهم وفي مرة جمب البيت بتقع طوبة وبتلاقي تحتها جواب من 50 سنة بنت كانت بعتها ومحدش شافوا يعني وبتقرر ترد عليه بعد كل السنين دي وفعلا بيجي حفيد الست دي وبيهزقها وبيقولها ان ليها بيتها واولادها و احفادها وبيمشي وبتجري وراه فتقابل الست دي وبتعرف ان جوزها توفي وبتصحي فيها قصة الحب دي وبيتدوا بدورا علي الحبيب المجهول ده .... وتعيش بقي لحد اخر الفيلم (جزء طويل بزيادة) وفي الاخر ...

- طبعا مش هاحرق الفيلم كل اللي قلته ده تقريبا 20 دقيقة من الفيلم بس عشان غالبا رومانسي فاللي هيتدبس يدخله مع صاحبيته ولا مراته يكمل بقي عشان ابقي فرحت شوية في البشر

- القصة : Tim Sullivan & Jose Rivera

فكرة روماسنية صحيح بس ممشيتش معايا في العصر ده حتي مع وجود حب و رومانسيات صحيح بس ناس بتروح وتسيب جوابات وحكابة جواب من 50 سنة محطوطة تحت طوبة بتقع صدفة بس لما بطلة الفيلم تلاقيها كانت واسعة قوي بس هنعديها ... نهاية الفيلم متوقعة من اول دقيقة زي كل افلام الحب مع ان في افلام بتبقي لسه رومانسية و نهايتها سعيدة بس مش بالسذاجة دي يعني

بس هو يأكل قوي مع البنات بتوع

Twilight – A walk 2 remember بس مش هياكل قوي مع الشباب خالص

- الاخراج

Gary Winick

مخرج افلامه خفيفة زي

Bride Wars (2009)

الفيلم اخراجيا احلي كتير من الكتابة و خصوصا استعراضه لايطاليا و مناظرها الطبيعية و السياحية

بس هو غير كده مش فيلم هتنتظر منه كدرات و شغل عالي

بس الفيلم كان سائد فيه قوي اللون الاصفر ويميل للاخضر ساعات و معرفش هو كان قصدها ولا جت صدفة ومش عارف مدلوها في فيلم عن الحب هيبقي ايه ؟

بس افضل كتير ما الفيلم يبقي احمر واحس لني وقعت في عيد الحب و شغل الدباديب و الارانيب اللي بيجي حساسية لامثالي .

- التمثيل :

Gael García Bernal

ممثل مكسيكي جامد جدا كان عمل

Amores perros - Babel

معرفش ايه حدفة يعمل دور صغير كده ... هو تمثيله فعلا احلي كتير من الادوار دي

Amanda Seyfried

المفروض بطلة الفيلم بس الحقيقة انا مش بستظرفها خالص ومكنتش عارفة اتعاطف معاها ..تعمل مشهج كويس و مشهدين لا

قفلتني منها من ساعة فيلم

Jennifer's Body

مع العزيزة ميجان فوكس اللي اتقفلت منها برضه جامد قوي خلاص

Christopher Egan

حفيد الست العجوزة ... ممثل جيد قوي كان دوره رجل انجليزي جد قوي وهو فعلا خنقني انا شخصيا في اول دوره بس بعد كده ابتدي يوضح قوي

Vanessa Redgrave

اهي دي بقي اللي صبرتني علي الفيلم ..سنها كبير صحيح بس ايه ممثلة فظيعة و رغم ان حكاية تتفرج علي قصة حب في الستين صعبة بس هي عملتها بشكل جامد جدا و يمكن دي من الحسنات القليلة قوي قوي في الفيلم الرومانزي ده

- الفيلم اخرة معايا 3.5/10 او نقول 4 عشان خاطر فانسا بس وصورة الفيلم الكويسة ... بس الحقيقة اكتشفت رغم اني رومانسيكي بس الافلام دي مبتكلوش معايا نهائي ... بفضل نوعية زي

Eternal Sunshine of the Spotless Mind

يعني تكون معمولة بضمير مش لسن الـ16 و المراهقة

بس هو اختيار موفق لو هتدخله و معاك صاحبتك

- الرجل الغامض

2010-10-13T02:51:00.000-07:00

- الرجل الغامض

- فيلم من افلام العيد ويمكن بقالي كتير قوي مشوفتش فيلم لهاني رمزي وبما انه بحبه كممثل هايل وبما اني مكنش ليا اختيار اصلا فشفت الفيلم

+ 18 مليان ايفهات جنسية (بلال فضل بقي ياجماعة)

- القصة (نحرقها) هي اصلا محروقة : عبد الراضي محاسب بيخرج كابته الجنسي انه بيروح المطار بيبوس كل بنت هناك و عايش مع اختة المشلولة بسبب غلطة فيا لمستشفي الحكومي و امه و باباه (مش بقول بلال فضل) وبيكتشف تلاعب في ورق الشركة فبيروح لصاحب الشركة اللي طبعا متوطا فيطرده وياخد مكافئه و يروح يجيب بيها لبس و يقرر يدحل بقي يلعب مع الكبار (بلا اي مبرر درامي ولا حتي لحظة تفكير او نسمع صوته بيكلم نفسه) وبيخترع لنفسه اسم جديد (رياض) ويبقي رجل اعمال بلا اي شركة ولا اي شئ و بيقابل نيللي كريم بنت غنية وبتشتغل في الاعمال الخيرية (بس ابوها مات و هو مفلس و هي بتدور علي عريس ينقذها) ولازم يحبوا بعض ده طبيعي وبتعرفه علي وزير الاستثمار اللي بيلاقي فيه عبقرية وبيصعده ويبقي من مساعدينه و بيوصل لرئيس الوزراء كمان وهنا بتظهر عصابة شريرة عارفة حقيقته فبتزوره ورقه باسمه الجديد و كل شئ و تديله مسدس و يمسكه و يرجعه عادي (هندي قوي ياحسين) و بعد كده بيتجوز نيللي كريم و يوم الدخلة بيصرحوا بعض بالحقيقة و يتخنقوا (بخيت و عديلة) وفي الاخر الوزير بيتقتل و بيتهم طبعا (رياض/عبد الراضي) ولان بصماته علي المسدس و كده و بتدخل نيللي كريم المحكمة و تسبل لهاني رمزي وبيقرروا يدوروا علي فتاة العصابة (فريال يوسف) فتتقتل فالمحاكمة تبرأه و يعيش هاني و نيللي في تبات و نبات .

- بلال فضل (سيناريو) انا عن نفسي رغم كل جرعات الكأبة و تكدير الحي و الميت بس بحب كتابتك وبتعجبني الايفهات حتي لو قبيحة (ودي مش قلة ادب مني) بس لانك من الشارع و فاهم قوي الناس بتقول ايه و الحقيقة خطفتلي كام ضحكة في الفيلم. بس انا مش فاهم ايه الفيلم ده بجد ؟ ولا سيناريو مترابط ولا احداث و مشاهد اتوضح قوي انها اتحذفت و كمان نهائة غير منطقية انا نفسي حسيت بغباءها الشديد يعني اوك براة من تهمة قتل الوزير بس هو مش زور اوراق رسمية و نصب علي الناس و انتحل شخصية وهمية ؟ فين عقابه ؟ هو عشان مسكين و عاطل يبقي نرحمه ؟ وكمان ايه النهاية انهم سافروا و مطار و قلق هو عاطل و هي مفلسة منين بقي ؟ ولا هو المفروض تربح من وظيفة مساعد الوزير و متاخدتش فلوسه برضه لانها مش نصب يعني ؟؟ و بعدين ياراجل انت عملت منطقة ايفيهات عالية قوي بس كان نفسي تزيد (افيه شخصية حجاج عبد العظيم اتنين ظباط تؤام .... منطقة عبقرية اصلا تتعمل فيلم لوحده) وكانت تخدم الموضوع و الكوميديا بدل مشاهد كرياكتورية كتيرة قوي متعودش عليها منك (لو من س من الناس ايه كان ماشي لانها طبيعته)

- محسن احمد (الاخراج) ليس في الامكان احسن مما كان ... الصورة كويسة بحكم المهنة كمدير تصوير بس للاسف مفيش اخراج او كادر علق او اي لمسه رغم انها التجربة التانية و المفروض اول تجربة بتعدي بس التانية صعب .... اعتقد اسمك كمدير تصوير اهم كتير من كلمة مخرج لو قارنا الاتنين ...وبعدين اخر مشهد بتاع الاغنية والرقص غير منطقي و تطويل ملوش اي داعي و علي راي واحد صاحبي هما عملوا كده عشان نسمع الاغنية غصب و منقمش و نمشي.

- محمود طلعت (المزيكا) بحس انك فاهم هاني رمزي و بتعمل مزيكا علي ايفهاته ... من حسنات الفيلم المزيكا

- ايمن بهجت قمر (اغنية لينا رب) مش مصدق الكلام عجيب و غريب وخصوصا شطر هبطل اللي كنت بعمله و انا شب ... الكلام ده لا يخدم دراما ولا هو مونولوج (لابو الليف) .... سبوبة يعني ولا مكنش فيه وقت لكلام افضل من كده ؟؟ اعتقد هتفهم قصدي لو قارنت كلام الاغنية دي باي اغنية قديمة من اول ماعملت اغاني افلام و نشوف .

التمثيل :

-فريال يوسف : بتثبتي موهبتك يوم بعد يوم .... شخصية لذيذة بس اعتقد انتي ادوارك الجد افضل كتير من الكوميديا

- مروة حسين : ممثلة كويسة بس محتاجة وقت عشان تظهر اكتر

- حجاج عبد العظيم : تؤام بوليسي ...شخصية اتظلمت بعد الاهتمام بيه اعتقد كانت ملعب ايفهات ولايق عليك قوي بس تتعوض بقي

-وفاء سالم/عمر الحريري/شعبان حسين/يوسف داوود : العادي ومنطقي اللهم ان عمرو الحريري واضح قوي انه تعبان مش بيمثل يعني

-حسن حسني : العادي و الاوفر ... طبيعي

- نيللي كريم : فتاة وديعة و بنت ناس و مسالمة ... دي طبيعة اكتر منها تمثيل ... ردود افعال عادية قوي قوي يعني

- هاني رمزي : فيلم قليل زي اخر كام فيلم بس الاختلاف المحاضرة اللي اتضافت بلا اي لازمة ... يعني رغم ان الافلام السابقة بلا هدف بي كانت بيبسطني اني اضحك فيها و منتظرش حد يطلع يقولي محاضرة و يعيط و المفروض اصدف بالعكس احترم فيكي قوي انك بتعمل شوية ضحك و ااقلب مش لازم اضحك علي الناس وااقول اني بعرف امثل ...لان مفروغ تماما الكلام عن موهبتك العالية اللي بتضيع في افلام زي دي ... اعتقد تعيد حسابات و تفكر في افلام قوية زي محامي خلع وحتي ظاظا اللي علي قد سياسته بس كان كوميدي كتير و منطقي عن ده

- الفيلم اخرة 3/10 وده عشان بحب هاني ومزيكا محمود طلعت و الصورة